عمرك فكرت إن الناس عاملين زي الأكل.. يعني فيه ناس تقيلة ع القلب زي أكل مرات عمك، اللي السمنة بتبقى عايمة على وشه، وفيه ناس نسمة متحسش بيهم زي أكل الدايت.
عُمر كان حد واحشك أوي، ففكرت إنك عايز تاكله؟ طب ليه بنقول للناس اللي علطول مسافرين وبنشوفهم أوقات قليلة: \”إحنا ملحقناش نشبع منك\”.
عمرك فكرت إن البذر اللي في الفاكهة دا موجود عشان يفكرنا بالناس اللي بنحبهم وعندهم شوية عيوب وإحنا بنشيلها على جنب؛ عشان منخليهاش تكدرنا.
طب عمرك حسيت إن نفسك موعت من كتر ما بتشوف ناس حلوة؟
الأكل زي الناس، ولو بدلنا أدوارهم هينفع جدا.. هتلاقي نفسك بتشكي همك لطاجن العكاوي، وهو يواسيك، وتاكل صاحب عمرك اللي بقالك كتير مشوفتوش ومشتاقله، وهتلاقي نفسك تطبخ لما تبقى متضايق، وتكلم إنسان عزيز على قلبك لما تجوع
اعتقد ممارسة فعل الأكل مع ناس بتحبهم متعة خالصة مخلصة.. الأكل بيملا البطن، والناس بتملا القلب والعقل والروح.. أهي دي اللي بيقولوا عليها الوجبة المتكاملة.. حنعوز إيه تاني؟
واللي قبلنا قالوا: جنة من غير ناس ما تنداس.. والناس الحلوة يلزمها أكلة حلوة، فالجنة اللي من غير أكل وناس ملهاش لازمة من الأساس.
لو طبقنا صفات الأكل على الناس، هنفهمهم أسرع.. يعني مثلا، فيه ناس زي البطيخ, ناشف من برة لكن من جوه مسكر ومرمل.. دول اللي راسمين وش خشب، بس هما قلبهم قلب خساية.. بيرسموا نفسهم على شخصية غيرهم، عشان ميتاكلوش بسهولة.
وفيه ناس حامية زي قرن الشطة، وجودهم ضروري عشان النفس تفضل مفتوحة, بس الكتير منهم يتعب.
وفيه أشخاص أساسيين في حياتنا زي رغيف العيش, ممكن نقتل بعض عشان ميبقوش مع حد تاني.. وفيه اللي علاقتك بيهم قصيرة ومتحددة ومعروفة، زي الشوربة.. لو بردت ميبقاش ليها معنى.
وفيه ناس مهما البعد فرقكم, بيفضلوا موجودين.. زي الآيس كريم, بشرط حسن التخزين والمعاملة.
وفيه بني آدمين كشري.. طبقات فوق بعض، وكل ما تاكل حبة وتعرفهم حبة, تكتشف إن لسه فيه جديد.
قرايبك اللي بتشوفهم م السنة للسنة, زي الكحك والفسيخ والرنجة.. لازم يتاكلوا في وقت معين, وتشوفهم في وقت معين، وتستحمل أي تلبك معوي هيحصل بسببهم في الوقت المعين دا برضه.
وأكيد كلنا في حياتنا ناس زي البهارات.. الحياة بتمشي من غيرهم عادي, بس وجودهم بيعمل فرق السما م العمى.
فيه ناس رايقة زي الطبخة اللي بتتسوى على نار هادية، وفيه ناس طايشة زي الأكلة اللي معمولة بسرعة فاتحرقت، من بره وجواهم لسه مستواش.
الناس زي الأكل.. فيه ناس تشيل عنك الحمل وتخفف أحزانك زي طبق مكرونة بشاميل. وفيه ناس عاملين زي أكل الشارع؛ رمرمة توجع البطن وممكن توديك المستشفى.
علاقتنا بالناس هي هي علاقتنا بالأكل.. لما بتيجي تاكل أكلة جديدة، لازم تاخد عليها الأول، عشان تستطعمها، ولما تعرف ناس جديدة بتاخد وقت عشان تآمنلهم.
اللي بيرمي نفسه ع الناس.. يتعب، زي اللي بيدخل ع الطبق الرئيسي من غير مُقبلات.
لازم الأول معرفتنا بالناس تتدرج بحاجات خفيفة، ثم الأثقل ثم الأثقل، وكل دا نهايته جميلة.. طبق الحلو.. وبردو الحلو الكتير ممكن يجيب كومة سكر، فخلي علاقتك بالناس الحلوة بزيادة.. طياري.
وعشان متزهقش لازم يبقى حواليك أصناف كتير وناس كتير.. لكن برضه متخليش الأكل الفرنساوي الشيك المتزوق، ينسيك العيش والفول وكباية الشاي.. خليك فاكر إنك مهما روحت ومهما جيت، فيه ناس هترجعلهم في الآخر.. توبك من توبهم وعاجنينك وخابزينك.
حياتنا كلها عاملة زي الأكلة وإحنا اللي بنقرر تبقى حلوة ولا صايصةً. وسخنة ومستنية الأكالة، ولا بايتة وباردة وتسد النفس.
أصل فيه حاجات كدا الملل بيخليها زي صينية الفراخ.. اللي بقالها كام يوم في التلاجة لحد ما بقت مقددة.. فيه ناس بيرموا المقدد في الزبالة، وفيه ناس بيعملوا إعادة تدوير؛ شوية بطاطس على الفراخ وتبقى كفتة فراخ. بس برضه بيفضل الموضوع بايت ويمسخ زيادة.
ساعات المقاوحة بتبقى وحشة، والطبخة البايظة توجع البطن بدل ما تملاها. الحياة زي الأكل مبيستنوش حد.. لو عندك كلام ناحية حد قوله, ولو نفسك هفّاك على طبخة.. كُلها.. متموتش وانت في نفسك كلام تقوله، ولا في بؤك شوق لطعم.. فضوا التلاجات م الأكل البايت، والحياة من الناس اللي ملهاش طعم.. كلوا مع اللي بتحبوهم أو كلوا اللي بتحبوهم، لعلكم تفلحون.