في الفترة الأخيرة انتشر الكلام حول \”الاختفاء القسري\”، وكان فيه موجة من الاستنكار كده، لأن واضح إن ناس كتير أول مرة تسمع المصطلح ده, فطبيعي الرأي العام استغرب وافترض على طول إن ده اختراع إخواني لتشويه صورة مصر عالميا.
الاختفاء القسري موجود في مصر وبيحصل بشكل ممنهج، بغض النظر بس لأن الناس أول مرة تسمع عنه فمش فاهمين ده إيه، وبرضه يبدو إن فيه منظمات غريبة ليس لها مصداقية اكتشفت الموضوع ده، فعاملة ذعر للنظام في مصر والموضوع قلب خناقة.
أنا حبدأ بتعريف الاختفاء القسري بحسب القانون الدولي لحقوق الإنسان باللغة القانونية، وبعد كده حشرح يعني إيه.
الاتفاقية الدولية لحماية جميع الأشخاص من الاختفاء القسري بتعرف \”الاختفاء القسري\” بأنه: \”الاعتقال أو الاحتجاز أو الاختطاف أو أي شكل من أشكال الحرمان من الحرية، يتم على أيدي موظفي الدولة، أو أشخاص أو مجموعات من الأفراد يتصرفون بإذن أو دعم من الدولة أو بموافقتها، ويعقبه رفض الاعتراف بحرمان الشخص من حريته أو إخفاء مصير الشخص المختفي أو مكان وجوده، مما يحرمه من حماية القانون.\”
بمعنى إن أي حالة تسمع فيها عن إن واحد اتقبض عليه، وأهله ما يعرفوش هو فين، ده اختفاء قسري, وقيس على كدة بقى أمثلة تانية زي:
– حد اتقبض عليه من غير إجراء قانوني.
– الداخلية رافضة إنها تبلغ أهل المقبوض عليه عن مكان احتجازه.
– الداخلية رافضة إن حد محتجز يقابل أهله.
– الداخلية رافضة إن حد محتجز يقابل محامي.
– مرور وقت ولو قصير من غير ما تعلن الداخلية عن مكان المحتجز وظروف احتجازه.
– عدم توجيه تهم للمقبوض عليه أو ترحيله للنيابة.
– يعني لو فيه أي حد أتقبض عليه وتم إخفاء مكان احتجازه ولو ساعة واحدة، ده يعتبر مختفي قسريا.
يمكن جريمة الاختفاء القسري مش معرفة في القانون المصري بشكل مباشر, بس فيه مواد كتير في القانون بتجرم جميع الحالات اللي تندرج تحت تعريف الاختفاء القسري.. يعني مثلا في الدستور المصري مادة 54 إن ما ينفعش يتقبض عليك إلا في حالة تلبس أو بأمر قضائي بعد تحقيق. كمان بمجرد ما يتقبض عليك، لك حق الاتصال بأهلك وبمحامي، وماينفعش تستمر في الحجز أكتر من 24 ساعة، وبعدها لازم تروح النيابة.
قانون الإجراءات الجنائية المصري برضه بيقول إن أي حد يتقبض عليه لازم يتحول على النيابة في خلال 24 ساعة.
المهم إن في جميع الأحوال مفيش حاجة اسمها إن واحد يتاخد من الشرطة، وماحدش يعرف هو فين، ولا حد يعرف يقابله.
المجلس القومي لحقوق الإنسان سجل حوالي 100 حالة اختفاء قسري في الفترة الأخيرة من مايو 2015. المجلس بعت القايمة بالأسامي للداخلية، والداخلية كشفت عن مكان 24 حالة فعلا طلعوا محتجزين عندهم بشكل غير قانوني.
يعني جريمة الاختفاء القسري حصلت فعلا، وباعتراف الداخلية نفسها، حتى لو إنهم كشفوا عن مكان المختفين في الآخر.
كمان حركة \”الحرية للجدعان\” رصدت 163 حالة اختفاء قسري من أبريل 2015 في 22 محافظة, فيهم 64 حالة ظهروا بعد أكتر من 24 ساعة احتجاز غير قانوني.
من أشهر الحالات المختفية قسريا، حالة مصطفى الماصوني اللي اختفى من يونيو 2015.
ماصوني اتخطف من وسط البلد، وأهله اتأكدوا إن الأمن اللي أخده، لأن مدير ماصوني في الشغل جات له مكالمات من الأمن الوطني بتسأل حاجات عن ماصوني، وواضح إنهم بيتأكدوا من معلومات هو قالها في التحقيق.
ماصوني لحد دلوقت مختفي ماحدش من أهله يعرف هو محتجز فين.
دلوقت بعد ما شفنا إيه الظروف إللي بتخلي فيه قضايا كتير ينطبق عليها مصطلح الاختفاء القسري، طبيعي نفهم ليه في كلام وبلاغات عن إن فيه مختفيين قسريا، وإن الموضوع مش بدعة ولا حاجة، وإن فيه حالات كتير بتحصل يوميا ينطبق عليها تعريف الاختفاء القسري, لأنه ببساطة أي اعتقال غير قانوني في مكان غير معلوم لأهل المقبوض عليه أو المحامي بتاعه، هو بطبيعة الحال اختفاء قسري.