اسمحلي أقول.. واخدِش حياءك بالمعقول
مرّة في ثورة شعب في جرّة ثار ع الغول
مات الشعب وعاش الغول
شاب في مرّة في ماتش الكورة مات مقتول
عشرة في أسرة اتغدّوا في مرّة ومليون مرّة بطبق الفول
مرّة مواطن عاش في مقابر.. مرّة القادر مات مملول
مرّة في مجلس شعب في مرة انتخبوا كام مِيتْ مخبول
مرّة الألف مواطن غرقوا.. مرّة الألف في ألف اتحرقوا
مرّة في مرّة ومرّة ومرّة واتهرّب سيدنا الدلدول
مرّة الغاز اتصدّر مرّة واتسرّب مال المسئول
مرّة عمارة في وسط الحارة وقعت على راس البهلول
مرّة أطبا اتضربوا في مرّة.. والميّت عالجوه بمحلول
مرّة الصحفي اتقصفت قيمته ومرّة الطالب مات مسحول
مرّة الفصل فيه تسعين دِكّة.. والواجب تملا الكشكول
مرّة الست في مترو اتضربت.. واتحرّش بيها مِيتْ عنتول
مرّة فيه شبكة صرف وضربت عملولنا شبكة محمول
مرّة مواطن هتكوا في عرضه.. وعرضه وعرضك أصبح طول
مرّة محافظ كرّم بيضة.. آه والله.. من قِلّة بيض الزغلول
مرّة المنطق مات مشلول
إيه رأيه سيدنا المخدوش.. تاخد تاني ولا تقول..
لأ ماخدوش؟