يحكى أن مواطنا شريفا أشتكى لمواطن شريف تاني، إن فيه مواطن غير شريف اسمه أحمد ناجي كتب رواية بعنوان \”استخدام الحياة\”، استخدم فيها ألفاظا لأعضاء جنسية كلنا عارفينها، خدشت حياء بنت المواطن الأولاني.
جه المواطن التاني، طلب من الأولاني إنه لازم ياخد حق بنته، ويرفع قضية ضد ناجي، فاتحبس سنيتن، ولا تعقيب على أحكام القضاء.
التعقيب الوحيد اللى القانون يسمحلي بيه، هو إني اسأل المواطن الشريف الأولاني عن شوية حاجات مهمة عشان أرتاح واطمن إن بلدنا ماشية على الطريق اللى ح يوديها في ستين داهية.
هي جملة \”ديك أمك\” اللازمة لـ\”مرتضى منصور\”، مخدشتش حياء بنت حضرتك، طيب مجتش تسألك يعني إيه ديك أمك يا بابا اللى سيادة المستشار بيرددها ليل نهار!
بلاش مرتضى منصور، كم السب واللعن المعروض ليل نهار مخدش حياءك، مقعدتش ولا مرة أنت وبنتك على كافتيريا، ومجاش حد من الشباب الصغير الذي لم يتجاوز العشرين وشنف آذانك وآذان بنتك بأبشع الألفاظ.
أغاني المهرجانات لأولاد سليم اللبنانين، والمواصلات مخدشتش حياءك!، موظفين الحكومة مخدشوش حياءك!، الصرف الصحي مخدش حياءك، العيشة واللى عايشنها مخدشتش حياءك!.
خلينا نسألك سؤال تاني، لما أحمد موسى قاعد ليل نهار في الفضاءيات يستهيفك وعرض فيديو للعبة فيديو جيم، ده مخدش حياءك!
الأمل في علاج فيروس سي والإيدز والسكر والضغط والصدفية بسبب جهاز عبد العاطي كفته مخدش حياءك، طيب يا عم المواطن الشريف، مشفتش كل ده ومركبتش مواصلات ومقعدتش على كافتيريا، محستش مره واحدة إن أمين الشرطة يقدر يمسح بكرامتك الأرض، ويقلبك في قرشين، وده كمان مخدش حياءك!
إنسانيتك منقحتش عليك وحاولت ترفع قضية تكسبها لنصرة مصر، زي ما نصرت بنتك كده، عشان الشباب اللي في السجون وحالات الاختفاء القسري.
طيب يا سيدي محستش بالقفا اللى نزل على معاليك لما مبارك وعصابته كلهم خدوا براءة، وده كمان مخدش حياءك؟!
يا عزيزي إحنا دولة بره التاريخ.. عالة على الأمم، تقريبا لسه بنعتز بنسبة الأمية، في المركز الأخير في جودة التعليم، حبينا فيروس سي جدا لدرجة إنه قرر يستقر هنا ومايفارقناش، وكمان في صدارة الدول المتحرشة بالنساء ومن أوائل الباحثين عن المواقع الجنسية في جوجل.
عزيزي المواطن الشريف أقدر اقولك بكل فخر واعتزاز: \”ديك أم حياءك\”.
يُنشر هذا المحتوى في إطار حملة مشتركة بين مواقع \”زائد 18\”، و\”مدى مصر\”، و\”قل\”،و \”زحمة\”. للتضامن مع الروائي أحمد ناجي.