صديقتي مستبشرة جدا بالإنجاز المصري الجديد، فرحانة لفرحة مصر، متفائلة، أتمنى أن أصل لجزء بسيط من تفائلها بالمستقبل عموما، وبهذا المشروع على وجه الخصوص، مر أسبوع ثم أسبوع آخر وهي لاتزال تهلل فرحا.
– أتمنى أن أفرح مثلك والله.
– مصر كلها فرحانة.. لكن النكديين يمتنعون.. حكمة معروفة.
– والله ليس نكدا.. لكن أنا مش فاهمة حاجة.
– الغريب أنكم لا تفهمون ومصرون على أن تصيبونا نحن باليأس!
– \”نحن\” لا نفهم؟ و\”أنتم\” تصابون باليأس بسببنا؟ من أنتم؟
– نحن المتفائلون نحلم بأن ينصلح حال مصر، أما أنتم فأعداء النجاح.
– أعداء النجاح؟ كلنا نحلم بانصلاح الحال، لكن \”هو فين\”؟
– الإنجاز واضح لكن \”للي عايز\” يشوف!
– الحفلة كانت عظيمة.. لكن المشروع نفسه في علم الغيب.
– حفر قناة في سنة واحدة وبفلوس المصريين.. إيه المطلوب تاني؟!
– أيوه.. لكن هي تفريعة وليس أكثر.
– مش أحسن من مفيش! ثم أنتي فاهمة معنى تفريعة ولا كلام وخلاص؟
– يعني إيه تفريعة؟
– معرفش.. لكن أكيد خطوة كويسة.. تفتح بيوت كتير.
– لكن لازم يكون فيه خدمات حوالين المشروع من أجل فتح البيوت وأكل العيش، يعني لما تتعمل المشاريع المكملة دي نبقى نشوف ونحكم.
– ماهو مشوار الألف ميل يبدأ بخطوة.
– بلاش الألف ميل.. ياريت مصطلح غيره يكون حسن السمعة.. وبلاش كمان تقولي الإصلاح الاقتصادي.
– هيتعمل مشاريع حواليه أكيد.. يكفي أن قناة السويس هي المصدر الأول للدخل في مصر.
– الحقيقة أول مرة أسمع المعلومة.
– أنتي ما بتقريش أصلك.
– وأنتي قريتيها فين دي؟
– مقرتهاش بس أكيد يعني.
– والزراعة والصناعة والتعدين والسينما.. فين كل ده؟
– ….
– بلاش كل ده، طب والسياحة؟ أنا كنت متخيلة \”السياحة\” هي اللي مفروض تكون المصدر الأول للدخل.. غير كده يبقى عار علينا.. عار بجد.
– مش فاهماكي؟
– عندنا أكتر من نص آثار العالم، آثار فراعنة ومسلمين وأقباط، وعندنا بحرين، وصحراء وشمس.. بلاد تانية مفيهاش حاجة ودخلها الأساسي من السياحة، فيه بلاد صغيرة لا داعي لذكرها مش بتفضى من السياح لا صيف ولا شتا.. إحنا بقى فين السياح بتوعنا؟!
– السياح هربانين من الإرهاب، لما نحاربه هيرجعوا.
– السياح هيهربوا حتى لو مفيش إرهاب.
– من إيه يا المتشائمة؟
– من الرصيف اللي مش موجود، من المطبات، من الشحاتين، من المتحرشين، من البلطجية اللي جنب الأهرامات، من المواصلات، من خدمة الإسعاف اللي هتوصل بعد ما يكون المصاب مات، من الزحمة، من قلة الذمة في المحلات، من ضعف الخدمات في كل المجالات.. أقولك إيه تاني؟ مش مهم السياحة، الله يكون في عون المواطن اللي مستحمل كل ده.
– يا عزيزتي المواطن فرحان، كفاية الافتتاح والحفلة اللي خلت صورتنا في العالم مشرفة.
– يا عزيزتي المواطن مفرهد وحران، أنا بقول إيه وأنتي بتتكلمي عن إيه؟ الحمد لله على نعمة الصورة المشرفة فعلاً ومش مهم المدارس ولا المستشفيات.. ربنا يديمها علينا نعمة.. كده ارتحتي؟
– الحمد لله أنك أخيرا اقتنعتي!
– الحمد لله
– طب فرحتي؟
– !!!!!!!