فاكر قضية \”حمام باب البحر\”؟ طب فاكر الصورة اللي صورتها منى عراقي لمجموعة شباب وهما شبه عراه في نفس الحمام؟ طب فاكر الشاب اللي حاول ينتحر بسبب فضيحة الحمام مع إنه خد براءة؟
أنت فاكر أصلا منى عراقي؟
البداية:
يقال إنها مخرجة.. يعني المفروض زميلة، بس عمري ما سمعت عنها ولا شوفتها، فجأة تحولت لمذيعة ولديها عدد لا بأس به من المتابعين – منهم أمي على سبيل المثال- لها برنامج على قناة القاهرة والناس، اسمه \”المستخبي\”، بتنزل كده بنفسها بكاميراتها ومعداتها تكشف الجناة والهاربين والساقطين.
مرة تم ضبط اتنين من فريق عملها بحيازتهم \”هيروين\”، وقالت في النيابة إنها كلفت المتهمين بعمل تحقيق استقصائي عن بيع المخدرات، وجزء من التكليف ده إنهم يشتروا بالفعل مخدرات، فرحت النيابة بمنى وأخلت سبيلهم!
خد من ده كتير، صحيح هو ده مش دور الأستاذة الإعلامية، لكن حضرتك قدام أمر واقع. تلف الأيام وتكتر الحلقات، وفي أحدى الحلقات تعلن عن مفاجأة، سبق بالصوت والصورة، وكانت المفاجأة تصوير حصري – وغير أخلاقي- من داخل الحمام الشعبي برمسيس \”حمام باب البحر\”، منى راقبت الحمام، وقدمت بلاغا إنه وكر للشذوذ الجنسي، ولأننا في بلد بتخاف علي أعضائها الذكورية، تم الهجوم على الحمام، وإلقاء القبض على كل من به وهم شبه عراه، واعتبرتها الست منى لحظة انتصار ولابد توثيقها، ووقفت بكل زهو تلتقط صورة عجيبة لضحايا الحمام، بلا أي إنسانية أو رحمة أو حتى انتظار نتيجة التحقيقات.
أخدوا براءة يا منى.. والصورة حاتفضل تطاردك طول حياتك!
منى قررت تزود إبهارنا، وخرجت في حوار صحفي بعد حكم المحكمة ببراءة المتهمين، وفي نفس يوم محاولة حرق أحد المتهمين نفسه، بتعبر عن صدمتها في الحكم، وإن مصر مازالت تصدمها يا حرام.
المأساة في المكابرة إنها مش شايفة في اللي عملته أي إجرام، وتصدمك بأنها شايفة نفسها خلال سنتين حاتبقى\”أوبرا وينفري\” العرب، وتكملة لدور المخبرة اللي بتلعبه، قررت تشرك المجتمع معاها ويتحولوا لمخبرين زيها، تبرعت بحملة تنطلق بها نحو مزيد من المهنية، وهي \”راقب.. شارك.. ابعتلنا\”.. يعني كلنا نبقى مخبرين ونمشي في الشوارع نصور بعض ونبلغ عن بعض، والحقيقة إحنا لو في بلد يحكمها قانون، كان زمان منى عراقي بتتحاكم دلوقتي.
منى ضيعت مستقبل شباب ودمرت أسر وكله بالزور، ولسه طاقتها شغالة.
منى الرائعة اللي قدمت بلاغا بتتهم فيه من في الحمام بممارسة الشذوذ الجنسي، رحبت من يومين بقرار تأييد زواج المثليين في أمريكا، وكتبت على صفحتها الخاصة بالفيسبوك: Obama .. #love Wins.. منى اللي بتعاني من ازدواج في الشخصية، رحبت بقرار الجواز – طالما جواز يبقى حلال-!
منى في تعليق على صفحتها عن تأييدها لقرار الزواج، وهي صاحبة بلاغ حمام رمسيس قالت نصا: \”قضية حمام باب البحر قضية تجارة جنس، ودي جريمة ممنوعة في كل العالم\”.
طالما أنتي مطلعة على قوانين العالم، ماعرفتيش يا منى إن التشهير ممنوع؟ تدمير بيوت الناس ممنوع؟ تصوير الناس دون علمهم ممنوع؟ إنك تشتغلي كما المخبرة، وعاملة نفسك إعلامية ممنوع؟
منى ضميرها نقح عليها وشافت إن قضية باب البحر جريمة، لكن زواج المثليين بيس وحرية!
يا منى عيب أختشي.. دي صورة شباب حمام رمسيس لسه بتطاردك!
#عالجوا_منى_عراقي