الحب والجواز اللي اتعودنا نشوفهم في الأفلام أو نقرأ عنهم في الروايات إن \”هو\” و\”هي\” يتقابلوا، يحبوا بعض، يرتبطوا، يعيشوا في تبات ونبات ويجيبوا صبيان وبنات اسمه هو اللي هياخدوه منه وبس.
لكن الواقع بيقول كلام غير كده خالص.. الحقيقة في بلدنا أو مجتمعنا العربي على وجه التحديد إن غالبا في واحدة سِت من قرايب \”هو\” بتكون متولية الموضوع وبتتعامل معاه بشكل شخصي بحت! لدرجة إنها بتدي له اهتمام يفوق اهتمام الإعلام المصري بالذكرى السنوية لحدث تاريخي زي قناة السويس الجديدة مثلا! وليكن..
السيدة الفاضلة دي بتقابل أم \”هي\” وتطلب إيد بنتها، من غير ما \”هو\” أساسا يعرف إنه بيتم تدبيسه في جوازة وكلمة مع ناس هو أصلا مقابلهومش!
قد يكون الغلبان ده مش في دماغه الجواز وبيخطط لحاجات تانية لمستقبله، أو اتخرج وقاعد على القهوة، أو بيحب واحدة تانية مش معبراه أو بتحبه وأبوها مش راضي بيه، وطبعا دي أسباب ماتديش الحق لاتنين ستات قرروا فجأة يوّفقوا راسين في الحلال ويلّموا الشامي على المغربي.
أما \”هي\”.. الصورة النمطية عنها قبل ما حد يشوفها أصلا إنها من المؤكد هتطير من الفرحة وتخرج من عينيها قلوب وتنزل ترقص في الشارع أول ما تعرف إن في واحدة اختارتها هي بالذات عشان ترشحها لجوازة.. إن السِت تكرمت وقررت تنتشلها من العنوسة! دون عن بنات حواء اختارتها عشان تكرمها بلقب خطيبة فلان، ومن ثمٌ السيدة حرم الأستاذ فلان، وده في نظرها خدمة عمرها!
\”هي\” ممكن تكون دكتورة في الجامعة.. سِت ليها مركز وشأن، لكن في نظر مجتمعها هي واحدة مازالت تعاني الحرمان.. كل اللي حققته لسه ملهوش قيمة لإن مفيش في حياتها راجل.
ورغم إنها قد تكون متفوقة عليه من الناحية العلمية والأخلاقية، لكن ده باب لا يؤهلها أو يشفعلها إن مواصفات العروسة الحلوة في نظرهم ماتكونش فيها، بداية من لون بشرتها لحد حساب أبوها في البنك.
العروسة الحلوة هي اللي لازم أبوها وأمها مايكونوش منفصلين مهما كان بينهم مشاكل، وإلا أكيد أخلاقها هتكون منحرفة!
اللي تبقى بيضاء، لو طلعت سمرا شوية، معلش نتنازل لو فيها ميزة كويسة تانية!
اللي تكون اتخطبت بالكتير مرتين، لو أكتر تبقى معيوبة.. لا إوعى يا واد شوفلك غيرها.
اللي لازم أبوها حالته المادية تكون على الأقل متوسطة، أومال يعني إحنا هنشيل الجوازة كلها!
وبعد المعاينه ما تخلص، تبدأ امتحانات القدرات.
وإنتِ يا حلوة بتعملي إيه؟ بتدرسي؟
معلش إذا كان فاضلك سنة ولا اتنين تخديهم في بيتك وخلاص.. يعني هما اللي كانوا اتعلموا خدوا إيه! تشتغلي؟ ليه؟! أنا ابنى مش هيخليكي محتاجة حاجة.. أومال مين هيربي العيال ويخلي باله من البيت.. أنا؟ إحنا عايزين 3 أحفاد.. أقل من كده لأ.
أيوه ولدين وبنت.. ولد منهم على اسم المحروس جوزي جدهم، أومال إيه!
هتقعدي جنبنا.. طبعا لكِ شقتك، بس الغدا عندنا.. بتعرفي تطبخى؟
لبسك ضيق.. وسعيه.
عايزة شبكة؟ الدهب غالي ساعدوا بعض شويه الجواز محتاج تنازلات!
طبعا الموضوع بالنسبه لـ\”هو\” بيختلف في فكرة المواصفات.. مفيش أب وأم مثلا هيرفضوا عريس متقدم لبنتهم عشان أصلع ولا عنده كرش.. أصل الراجل مايعيبوش غير جيبه ولا إيه!
ولذلك نتخطى المرحلة دي ونقف عند القدرات.
والأستاذ شغال فين؟ ودي مرتباتها كويسة؟ بص يا ابني.. إحنا بنشترى راجل، لكن أنت شايف المستوى اللي بنتي عايشة فيه أنا وأمها.. مانرضلهاش تسكن في أقل منه.. مش كده؟
عايزين شقه 100 متر والشبكة 25 ألف.. إيه كتير؟ معلش خليها 20 ألف بس.. إحنا بنشترى راجل.
هنساعدك في الفرش.. أومال إيه! بس إنت النص وإحنا النص، وطبعا إنت عارف الفرح والفستان عليك.. عايزك تبيّض وشي.
لأ مش هختارلك يا سيدي.. على ذوقك، بس خلي بالك البوفيه مفتوح.. مش أبوك هيساعدك؟ يالّلا مبروك.. ماتنساش إحنا بنشترى راجل، وهي دي الأصول!
الجوازة بيع وشرا.. ممكن تقف على طقم حِلَل، وأصل أم العروسة استخسرت وجابت ألومنيوم بدل التيفال! وهكذا.
الموضوع مش محتاج دكتور نفساني ولا مدرب تنمية بشرية عشان يفكلنا العقدة.. الفكره كلها في مفهومنا للأصول.. نظرتنا لبعض، خوفنا من بعض تحت مسمى العادات.
الأصول عندنا بتمنع زوجين من الطلاق، وتجبرهم يعيشوا سوا تحت سقف واحد عشان المنظر الاجتماعي مايبقاش وحش، وعشان الناس ماتقولش دي مطلقة وتتكلم عنها وعن بناتها.
ونفس الأصول دي اللي بتخلي واحدة تمشي مع نص البلد وتستغفل اللي اتجوزها وهي لابسة وش الشريفة معاه، عشان قدرت تحافظ على كونها بنت، وعشان محدش يبصلها بصة مش ولا ب، ولا تعنس.
وبرضه الأصول اللي بتخلي أب يطلب من شاب مرتبه لا يتجاوز ٣٠٠٠ جنبه، شقة وشبكة ومهر وعفش بأكتر من ١٠٠ ألف جنيه، عشان ماتكونش أقل من بنت خالتها!
وهي هي الأصول اللي تخلي سِت تجوز ابنها عشان تشغل مراته خدامة عندها، وهي برضه اللي تخلي الولد لافف وداير ومتربي في الشارع، ومع ذلك هو حر لأنه ولد! إلخ…
الأصول في مجتمعنا أغلبها في الأساس بيتعارض مع الدين، سواء الإسلامي أو المسيحي، ورغم كده هي قواعد مقدسة، اللي يفكر يتجاهلها هيعيش منبوذ وسط الناس طول حياته.. مجرد عفن فكري وجهل متوارث من جيل لجيل بتتحكم في مصير ناس.
جواز الصالونات مش بالبشاعة دي بالتأكيد، بالعكس في ناس كتير قابلت نصها التاني في قعدة صالونات، وناس تانية اتجوزت بعد قصة حب، وكانوا لبعض روميو وجوليت، وبعد الجواز اكتشفوا إن الاختيار كان غلط!
الفكرة إن الجواز توافق بين شخصين أولا، ومن ثمّ عائلتين.. توافق فكرى وروحي ومحاور أساسية أهم وأعمق من مجرد مهر وشبكة وفرح.