بتسأليني عن التدخين.. اقولك بفخر إني بطلت.
آه كان صعب وخصوصا إني بدخن من وأنا عمري 15سنة.
لكن يا صديقتي مع العيال مفيش مستحيل.
السر إنك تحبي البيبي وتتنازلي عن حب نفسك.
وتحطي في بالك إن أهم حاجه في الدنيا هو – وهيفضل هو أو هي- أهم حاجه من غير منازع ولا منافس.
الفرق الوحيد إنك أنت الوحيدة اللي تقدري تحطي مقياس للحب ده.
ومين ممكن يعرف بتحبي عيالك أد إيه؟
التضحيات اللي هتقدميها مش ممكن تتعد، وده مش بيخوف.. ده بيحسسك أد إيه أنت هتتغيري في علاقتك بنفسك وعلاقتك بالعالم، لأنك داخلة على تجربة جديدة وفريدة.. معجزة.. التجربة دي خاصة بيكي لوحدك في المقام الأول، وبعدك ييجي الشريك والناس اللي بتحبك.
غير كده هيبقب فيه جماهير بتتفرج، وأنا اعتقد أنك لازم تبعدي عن الجماهير، وتركزي في روحك وتحابي على نفسك.
علاقتك بأولادك علاقه غير ندية.. أنت ما بتعمليش حاجة عشان مستنية ناخدي حاجة.. أنت بتعملي كل حاجة – بس- عشان توفري لهم السعادة.
المستوى الأغلب للناس أنهم بيحاولو يوفروا المسكن والملبس واللقمة، لكن السعاده تمنها غالي.. تمنها وقتك واهتمامك وتنازلك عن أنانيتك وحبك لروحك.
حاولي تفصلي كل ده عن صراعات إثبات النفس والنديه مع الشريك والتواجد مع الاصدقاء.
ليه؟
لأن ابنك أو بنتك هو مشروع عمرك الحقيقي، مش إكسسوار علاقتك الزوجية.. كل العلاقات اللي عملتيها في حياتك كوم وعلاقتك بأطفالك في حتة تانية.. لأنك السبب الرئيسي في وجودهم.
وهفضل أأكد عليكي.. استمتعي بيهم أد ما تقدري، لأنهم بيكبروا والايام بتجري، وكل حاجه تانية فاضلة، إلا اليوم اللي بيعدي وابنك أو بنتك يبتسم لك أو يقول أول كلمة أو يعمل حركة جديدة أول أيام عمره.. هي اكتشافات جديده ليكي في الحياة عن روحك ومدى صبرك ومدى معرفتك بمسالك روحك.. من حب وعضب وتحمل وسعادة وتعب.
صديقتي الحامل.. استمتعي بأنك في وسط معجزة، وبتخلقي روح من جواكي.. أنت والبيبي وبعدك ييجي العالم كله.
أنت أقوى وأجمل وأكثر نضوجا بحملك للروح دي.. أنا كان جوايا حته باردة في روحي أغلب الوقت.. لا ملاها ناس ولا شغل ولا سفر ولا نجاحات.. بس اتملت لما جبت \”أليكس\”، ومكنتش اعرف إني ممكن احب حد أد حبي له، إلا لما جبت آدم.
حبك لعيالك غير مشروط.. حب سحري بيغير العالم من حواليكي، وتبقي متصله بيهم على طول الخط.. حب له طقوس – تبان متعبة – لكن أنتي بطلة المشهد الوحيدة، وأنت المستمتعة بكل تفاصيل حياته.