(شوية حكايات عن البت نور بنتي)
بنخلف عيال ونقول عايزين يبقى عندهم القدرة على الاعتماد على النفس، واتخاذ القرار.. عايزين يبقى ليهم صوت وشخصية.. بس أول لما ييجوا ياخدوا قرار مايكونش عاجبنا.. أول ما يفكروا بره الصندوق اللي رسمناه لحياتهم (المعتمد بصورة أو أخرى على خبراتنا إحنا الشخصية، اللي هي لا تماثل بأي حال من الأحوال خبرتهم ولا الزمان اللي لِسَّه حايشوفوه) نرمي بكل حاجة عرض الحيطة، وننسى إحنا كنّا بنقول إيه!
لو أنت بتنادي بحرية الرأي وحرية الاختيار، المعضلة الكبرى حتبقى بالنسبة لك هي: شفت الشخص اللي في المراية بيعمل إيه؟
أيوه.. الشخص اللي في المراية ده اللي هو أنت/أنتي… أنا!
٢٠ مايو ٢٠٠٢ الساعة خمسة الضهر
خرج دكتور وليد هتلر من أوضة عمليات الولادة و معاه نور بنتي، وخلاني أشيلها لأول مرة.. حتة لحمة حمرا في أيدي عمالة تروح بعينيها يمين وشمال وأنا خايف احضنها افعصها بالحضن، بعدها بـ ٦ شهور.. نور كانت بتعرف تقعد، فكنت آخدها جنبي في العربية واقعد ألف بيها في الشوارع واتكلم معاها، والعربيات حواليا مش فاهمين مين المجنون اللي بيكلم نفسه ده.. ماحدش شايف القطة اللي جنبي، واقعد اقول إمتى حتطولي شوية عشان ماحدش يفتكرني مجنون.
وقت ما اخوها أتولد بعد ٣ سنين، نور كانت عندها نفس هواياتي، وبتحب سبايدر مان وباز لايت يير.
نور.. أنا مش عايز اشكلك زي ما أنا عايز.. أنا عايزك تتشكلي زي ما أنتي حتبقي عايزة.. عايزك تعتمدي على نفسك، وتفكري لنفسك، ولا أنتي مفروض تبقي عاملة زيي، ولا زي جدك ولا جدتك ولا تبقي عاملة زي مامتك؟
2011
نور أعلنت إنها عايزة تسافر تكمل تعليمها الجامعي بره، واختارت اللي عايزة تدرسه، هي عايزة تدرس رسم، واختارت البلد اللي عايزه تروحها، وعملت ريسيرش على الموضوع، وحطت خطة استراتيجية إزاي حتعمل كده، وحتنمي قدراتها في إيه مع نفسها عشان يبقى عندها فرص أقوى، وقالت مش عايزة اتجوز.. جدتها لأمها وبابا اعتبروها مجنونة وغبية.. يعني إيه بنت عايزة تسافر لوحدها؟ يعني إيه بنت مش عايزة تتجوز؟!
(باقولك إيه يا نور: سيبك من الناس دي.. اعملي اللي أنتي عايزاه)
٢٠١٢
نور عملت صفحة علي ديفيانت آرت عشان تعرض فيها رسوماتها.. عشان لما يبقى عندها جمهور، تبتدي تبيع رسوماتها عشان تبتدي تحوش.
نور اكتشفت إنها ما ينفعش تعمل حساب في البنك وحدها، عشان تقدر تبيع الرسومات بتاعتها وتحوش عشان مصاريفها، وأعلنت إنها مش عايزة تدخل معايا في شركة.. هي عايزة تبقى لوحدها، وزعلت مني عشان عملت أبليكشن صغير فيه كام رسمة هي عاملاهم، عشان كده أنا بأبوظ خطتها (مع إني كنت كاتب في الأبليكشن إن حقوق الملكية الفكرية بتاعتها)!
نور بطلت تحط رسوماتها على صفحتها، عشان ما استغلش (ما اسرقش) رسوماتها، وعشان تعرف تبيعهم لما تكبر!
٢٠١٤
وأنا في السجن طلبت من دينا مراتي، تخلي نور تعملي رسمة احطها على حيطة الزنزانة، عشان أخلي شكلها أحلى.. نور ما رضيتش تطلع رسمة جديدة (لِسَّه أسرار تجارية) وأدت لمامتها كام رسمة قديمة تطبعهم بوسترات ٥٠ سم x ٥٠ سم، السيد ضابط المباحث الهمام، قرر إن الصور دي ما ينفعش تدخل السجن.. دينا دخلتهم الزيارة اللي بعدها بعد ما قصتهم وخلتهم ٤٠ x ٤٠ (ماحدش يسألني إيه الفرق أو اشمعني المقاس ده ينفع يدخل والتاني لا).. الفكرة إن نور مارضيتش تبعتلي صور جديدة!
أبريل ٢٠١٥
عيد ميلاد نور قرب، وأنا عايز ابعتلها هدية.. أنا ما شفتهاش بقالي سبع شهور، فقلت اشتري حاجة كانت بتكلمني عليها من سبع شهور، وابعتها لها مصر.. كانت بتتكلم قبل ما أسافر هي ومحمود أخوها إن نتنتدوا حتنزل ليمتد إيديشن DS3 مع لعبة زيلدا، وأنا باشتري لقيت موديلين، واحد أغلى من التاني ٣٠ يورو، بس أكبر ببوصة.. قلت اجيب الأكبر أحسن، (عشان كده حاتشوف اللعب أحسن.. ده تفكيري أنا)، ولقيت نور بتكلمني بعدها بكام يوم تتفاوض على هدية عيد ميلادها، ولقيتها قلبتها مناحة! وأنا مش فاهم، هي بتقول إنها كانت عايزة الموديل الصغير الفاضي.. أنا جبت الموديل الأكبر! هي زعلانة ليه؟!
بعدها فهمت غلطتي، لأَنِّي ما عملتش ريسيرش كويس وفهمت إن الصغيرة ليها وشوش بتتبدل، وإن نور طلعت عايزة الصغيرة اللي مش ليميتد إيديشن مش الكبيرة، اللي هي أرخص النص أصلا! والأحلى إن نور قالت مش عايزاها، وإنها حتديها هدية لأخوها! يا بنت الإيه.. ده أنا بقالي شهرين باحوش عشان اجيبهالك، وهي مقتنعة إن أنا غلطان، عشان ماعملتش بحث كويس، وإنها مش طبيعي تكذب عليا وتعمل نفسها مبسوطة وهي مش مبسوطة.
الفكرة إن جوايا أنا فرحان بيها لأنها متمسكة باللي هي عايزاه، بس طبعا عامل نفسي زعلان منها وإزاي هي تطلع ندلة كده.
مادام أنا عايزها تطلع عندها شخصية.. يبقى لازم استحمل شخصيتها، حتى لو كلامها مش حايعجبني.