كتبت ستاتس مثلا.. صفحتي بقى – بيقولوا إن ممكن في صفحتك تقول اللي إنت عايزه
مثلا يعني مثلا: \”سناني بتوجعني.. أنا باكره دكاترة الأسنان\”
هتلاقي التعليقات كالآتي:
1- المتدين اللي هيفهمك دينك يا ضالة: لماذا تكرهين خلق الله؟ ألم يقل الرسول عليه الصلاة والسلام المسلم أخ المسلم….. والناس سواسية.. نق قلبك، ثم يرزعك \”أحاديث مأخودة من جوجل.. (خدي في وشك )\”.. راجعي نفسك قبل ما تكتبي حاجات كده.. وبعدين الرسول أمر بالسواك، لو كنتِ بتستعمليه ماكنش جرالك اللي جرالك.. لا والله.
2- المندهش اللي كل حاجة بتعمليها بيستغربها: ماكنتش أتوقع منك كده.. كاتبة زيك تقول كده (أصل الكاتبة بتخرج نار من عنيها وبتلف الدنيا بالليل على مقشة سحرية) توبي إلى بارئك.. في ناس بتابعك وبتأثري عليها فكريا، على أساس إني جيفارا!
3- الأليش: آجي أصلحهم لك.. أنا ولا دكاترة ولا بتاع.. مرة واحد دكتور سنان \”وأي ألشة بقالها 5 سنين\”، ولازم تضحكي.. وإلا تبقي متكبرة ودمك تقيل!
4- اللي تدخل تدافع كأن هي نفسها دكتورة سنان: مالهم دكاترة السنان؟ على فكرة دكتور الأسنان ده أخوكي وأبوكي وجارنا في العمارة والواد اللي كنت باحبه في ثانوي.. دول لطاف وأليفين وحبوبين.. مش معنى إنك قابلتِ واحد وحش، يبقى كلهم كده – وش بيصغرلك – وتلاقي نفسك دخلت على شغل الستات في سوق السمك، وإنتِ أكيد بتشتكي علشان حد حبتيه وسابك!
5- بنت الناس، أو بالأصح اللي عايشة في دور بنت الناس: على فكرة دادي وخالو وابن عمتو كوثر دكاترة سنان كويسين أوي، إنتِ أصلا مهملة في سنانك، ماتحمليش الكون نتيجة غلطك، بعدين الـ Dentist الكويس، لازم يكون متجرب.. أنا أعرف واحد كويس في زيزينيا، هو غالي شوية، بس دي سنانك هاف آ هارت.. جود لاك دير.
6 – اللي لابس قبعة المثقف: إنتِ فعلا حاطة وجع سنانك ودكاترة الأسنان في إستاتس واحدة! التعميم على فكرة شئ قاتل وخطير، لازم علشان تشتكي تكوني عملتِ دراسة أو مستندة على بحث علمي.. الكلام المطلق في الفضاء السرمدي غلط جدا.. إيه العك ده!
7- عم الإنبوكس: بصي ياهبة.. إنتِ زي بنت بنت خالتي، وعايز أنبهك، ماينفعش تعلني أرائك على الملأ، وتكرهي الناس فيكي.. على فكرة فلانة كلمتني وعمالة تشد في الستاير زعلانة منك.. ينفع كده؟ أي رأي ليكي لازم يكون بينك وبين ربك.. مصر بلد كل واحد بيعمل اللي هو عايزه بس تحت الترابيزة.. اتعلمي الدهاء والحيلة والمكر، وخليكي حويطة!
8- اللي بترفع حواجبها وبتكوني شايفاها: يعني يا هبة يا بسيوني، سايبة الكون كله، وماسكة في دكاترة الأسنان؟ يعني يوم ما سلمت عليكي وكان معايا جوزي دكتور الأسنان، وبستيني، كان نفاق؟ ماضربتينيش بضهر إيدك على وشي ليه؟ أما صفرا ومنافقة وغلاطة!
9- اللي بتحسي إنها واخدة وضع الأمريكان بيتبول: إيه ده!! (85 علامة تعجب) إيه اللي بتقوليه ده؟! يعني ينفع واحدة في سنك وفي مركزك تعمل كده؟ خليتي إيه للساقطين والقتلة وقطاع الطرق.. سيبك شوية من ألم سنانك، وانزلي الشارع وشوفي بنات زيك وأصغر منك بيسرحوا بمناديل.. افتحي التليفزيون وشوفي القتل والدمار.. انضجي!
10 – سياسي الغبرة: يعني هو الريس هيعمل لكم إيه ولا إيه يا شعب مابيتمرش فيه! ما إحنا قلنا لكم في خطة خمسية لتحسن أوضاعنا، وبالتالي هتقدري تروحي لدكتور كويس بدل اللي بتروحيلهم.. ودتونا ورا.. ما هو دكاترة الأسنان الإخوان اللي كانوا ماسكينها، هما اللي عملوا كده وخربوها.. اسمعي بشرة خير كده هتلاقي سنانك بترقص في بقك!
11- خالتي بمبة: تليفون ترررن ترررن.. ينفع كده؟ ينفع كده اللي بنتك بتعمله؟ بنتي بتبص لبنتك وهي قدوتها.. تاخد بالها من تصرفاتها كويس.. على فكرة دلوقتي بتتكلم عن حياتها الشخصية والدكاترة.. الله أعلم بعد كده في إيه؟ المرحلة الجاية الحشيش.. أنا قلت بس أقولك ونبهي أختها ماتقعدش كتير معاها، لأحسن تأثر عليها برضه!
12- عم الماركسي عدو الفلوس: على فكرة الرأسمالية الحقيرة هي اللي خلت أوضاعنا
كده.. ده في ناس بتبيع سنانها.. هل تعلمي يا رفيقة هبة، إن تبييض الأسنان بقي بـ 4 آلاف جنيه؟! الحل في البروليتاريا وتزاوج النباتات والعودة إلى الأصول.. اقترح عليكي مقاطعة
الأنظم الفاشية والعودة للحضن الثوري، فهناك ستجدين ضالتك!
13- الشتيم.. زي الهتيف كده، اللي مقتنع إن الراجل لازم يكون أبيح: أبو أم مرات خالة دكاترة الأسنان.. أنا آخر مرة مطلعين عين أبويا وأمي وخالاتي.. يلعن ميتين وحيين (…..) يخرب بيت… ما هو لو كل خروف دخل اتعلم كويس، إنما التعليم المجاني هو اللي بيخرج الأشكال الضالة دي… (حاجات كتير) أبو وأم ومرات خالة كده!
14- المراهق اللي لسه ماكبرش وشكله مش هيكبر: اللولي ده بيوجعك.. ألف سلامة عليكي يا جميلة.. تلاقيكي بس بتاكلي جلاس وتدوبي في قلوب الناس.. وش بيسبل.. على فكرة صورة البروفايل حلوة أوي!
بالرغم إني باتعرض لكل الناس دي.. لسه عايشة وباتنفس شهيق وزفير.. بس والله، الرحمة كويسة برضه 🙂