مش ممكن..
أنا بحلم؟
أنا بحلم؟
إحنا دلوقت حالا خسرنا أراضي مصرية وإحنا قاعدين في بيوتنا يا ولاد؟
لا حاربنا، ولا اتحركت قطع بحرية، ولا حتى حد هددنا ببيان ولا بخطاب ولا بزغرة ولا بنكشة.. كده؟ لا وإيه؟ والناس الوطنية، المحترمة، بتوع: تحيا ماااسر.. لاكي اللااااااه يااااااا ميييييسسسر.. بيبرروا، وبيقولوا الجزيرتين سعوديتين!
كده؟
الجزيرتين بتوعنا، وفيه اتفاقية بتاريخ 1906 بتقول إن الجزيرتين بتوعنا، وسنة 1950 فيه وثيقة رسمية بتقول إن الجزيرتين بتوعنا بتوعنا.
على فكرة ولو مش بتوعنا.. نديها كده بسلام؟ أمان يعني؟ هو حد بيدي أرضي؟ يعني هي إسرائيل أدت الفلسطينيين أرضهم عشان إحنا نتنازل عن جزيرتين إستراتيجيتين جيوشنا حاربوا عليها؟ هي إيران أدت الجزر لدول الخليج؟
إنتوا ضاربين إيه؟ ضاربين إيه؟ هاه؟
طيب يعني هي بتاعتهم وإحنا احتليناها؟ طب مش يضحوا عشانها شوية؟ يعملوا مقاومة، يعملوا مفاوضات، يعملوا صينية بطاطس.. إنما ياخدوها كده أمان يعني؟
فإيه؟ فالوطنيين اللي بيقولوا على ثورة يناير \”نكسة 25 خساير\” عشان اللي عملها خونة وعملا وجواسيس وكانوا عايزين يهدوا ماااسر، قالوا لا هي بتاعة السعودية بس كانت مسلفاها لنا عشان كان عندنا عزومة والسرفيس بتاعنا مش كامل.
إيه الخيال العلمي ده؟ بقى فيه حد بيسلف حد أرض، والتاني بيرجعها له؟
وكل الاتفاقيات الرسمية اللي بتقول إنها بتاعتنا ما قالتش إننا سالفينها ليه؟
وليه السادات اتفاوض عليها مع إسرائيل في كامب ديفيد، لما هي مش أراضي مصرية؟ والسعودية ما كانتش مشاركة في المحادثات.
الموضوع مالوش أي علاقة بالخلافات السياسية مع أي نظام.. دي مصر.. دي أراضي مصر.
بقى مبارك اللي لو ما كانش سقط كان أعدمني أنا شخصيا، كان ممكن يعمل حاجة زي دي؟ ولا في الأحلام.
بقى مرسي اللي بيتحاكم بتهمة الخيانة العظمى، واللي بعت شوية بطلجية يضربونا عند الاتحادية، قالوا نزل خريطة مصر من غير حلايب وشلاتين ومن غير ما يوقع أي اتفاقيات، بقى كان عمل كده؟
ده الاحتلال الإنجليزي ما عملش كده يا ناس.
لا.. ﻻﻻﻻﻻﻻﻻ.. مش ممكن.. مش ممكن إحنا حنتساب كده.
لا..
حد يلحقنا.
قلتها وقت حكم مرسي، وقت أن وضع المصريين في مواجهة تنذر بحرب أهلية، فصرخت على الهاتف مع وائل الإبراشي: حد يلحقنا.. مصر بتضيع والمصريين قصاد بعض.. حد من أجهزة الدولة يلحقنا.
وأعيد صرختي عسى أن تلقى أذنا صاغية: حد يلحقنا.
حد من المؤسسات السيادية يلحقنا.
إحنا الخونة العملا الجواسيس اللي خربوا مصر.. نستغيث بأي جهاز سيادي أن يهب لنجدة مصر.
حد يلحقنا.. أراضينا اللي حاربنا عليها وسالت دماء المصريين فوقها، تضيع الآن.
يا دولة إلحقينا.
يا من أقسمتم على استقلال الوطن وسلامة أراضيه.. إلحقونا.
أيتها الأجهزة السيادية المنوط بها حماية مصر.. إلحقونا.
يا رب إلحقنا.
يا رب إلحقنا.
يا رب إلحقنا.