صفحة بيضاء وقلم.. كاميرا ونور.. كتاب.. فيلم.. خيال، ووهم.
إحنا مين؟! إيه اللي حصل؟! اتغيرنا.. أيوة.. إحنا اتغيرنا.. اتبدلنا.. الناس اللي عاشت أيام الفراعنة خلصوا.. مالهمش وجود.. إحنا مجرد وارثين بس.. إحنا اتغيرنا.. منا أحفاد عائلات شريفة نعم.. منا أحفاد عائلات عربية نعم.. أحفاد جنسيات عاشت في مصر.. أحفاد عائلات مهاجرة.. الكل داب في النسيج المصري.. بلد تاريخية عريقة.. أول كل حاجة هتلاقيها هنا.. لكننا مش هما.. إحنا ناس تانية.. إحنا اتغيرنا.. لازم نبص في مرايتنا كويس.. خطر إننا نتجاهل ملامحنا الجديدة.. لازم الأول نعترف ‘ننا اتغيرنا.. علشان نبقى إحنا.
هما.. هما دول اللي هما الآخر، والآخر ده هو كمان اتغير.. مابقاش بتاع زمان.. هما أو الآخر لهم مرآة، لازم يشوفها الخليج.. الهند.. أوروبا.. آسيا.. أفريقيا.. هما مش زي زمان.. دول ناس تانية يعني.. الأصدقاء بيتغيروا والأعداء بقم يعلنوا عدائهم.. يعني هما ما يعرفوناش لأننا اتغيرنا وإحنا ما نعرفهمش لأننا اتغيرنا.
يبقى لا إحنا بقينا إحنا ولا هما بقم هما.
أنت بقى.. إمتى قعدت مع أنت.. إمتى ناقشته.. إمتى طاوعته، وإمتى منعته، وإمتى سمعته، لأن أنت بتكلمك وحضرتك مابتسمعش.. يا قالتلك ويا حاولت تنبهك، وحضرتك ناسيها، لأنك مش شايفها.. باصص على غيرها وخلاص.. مش باصص علشان تعدل نفسك ولا باصص علشان تساعد غيرك.. لا ابداً.. حضرتك نسيت نفسك ونسختها في مليون غيرك، ونسيت نفسك.. نسيت أنت.
هو.. هو بقى البحر اللي أنت بتشوفه، ومابتحاولش تبقى هو.. ولا عايز تتعلم العوم علشان تدخل البحر؟ ولا عايز تبص بعينك على البحر لحد مايشوفك؟ ولا عايز تشم هواه ولا عايز تسمعه.. وكأنك مبسوط بكده؟. محجوب عنه.. رغم إن البحر فاردلك نفسه.. هواه ومداه قدامك.. لازم تتأكد إنك محجوب معزول لاشئ، من غير هو اللي بيكشف لك نفسه شوية شوية، لو مش شايف اسمع، ولو مش شامم حس، ولو خايف تغرق خليك على بابه.. هو البحر فأخرج من وهم نفسك وسيبها للبحر وأنت الكسبان.
الصفحة البيضا
الصفحة البيضا حضرتك، والقلم عمرك.. كده كده القلم هيكتبك.. وكده كده الصفحة البيضا هترسمك.
يعني صورتك هتترسم بالقلم على صفحتك.. خلي بالك.. خلي صورتك جميلة، والجمال هنا جمال الأسرار.. يعني مش ملامحك ولا جمال ضحكتك ولا جمال عقلك.. نو.. الجمال جمال سرك.. يعني أنت وسرك مع بعض بيكونوا صورتك.. لو سرك تعبان، كله مشاكل وكره وغيره وحقد شر، هتترسم صورتك بكل هذا السوء، أما إن كان سرك فيه من أسماء الجمال.. الكرم الرضا العفو الرحمة الحب، هتكون صورتك جميلة منورة، أما إن كان سرك في بحره، إن كان سرك هو وهو سرك، ستكون نقطة في بحرك، فتصبح أنت هو وهو أنت.
الكاميرا والنور
دون نور لن تلتقط الكاميرا الصورة، وعلى حسب نورك هتلاقي صورتك.. نور قليل يهدي إلى ملمح.. خير من نور قوي يخفي ولا يُظهر.. النور داخلك هو صانع صورتك.. احرص على نورك، فهو سر صورتك.
الكتاب
وما أدراك ما الكتاب.. إنه كتابك أنت.. حروفك وجملك وحكاياتك أنت.. لا يحدد قيمة كتابك بلونه الجيد ولا بنقاء الأوراق ولا بالخط الجميل.. كلها مقدمات توحي وتوهم.. توحي بجمال الكتاب، أو توهم والكتاب بغيض.. كتابك أنت أولى به.. حاذر من خروجه دون المستوى، واحرص على ظهوره معطرا واضحا وسليما.
الفيلم
أكثر ما يقبل عليه الناس، هو الفيلم، ولكل فيلم ناسه، ولكل جمهور فيلمه.. الفيلم اصبح متاحا للجميع، وهنا الخطورة، والحفرة التي دائماً يقع فيها أصحاب الأفلام.. يصنعون الأفلام دون أسرار.. الفيلم سر، وبدون سر.. تفشل الأفلام لخلوها من الأسرار، فاحرص على السر وأنت تصنع الفيلم.
الخيال هو أنت
كيف تعيش بدون خيالك، كأنك تملك نوافذ كثيرة، وتنسى فتح أبوابها.. خيالك هو عزك وسلطانك وأنسك وحبك ورضاك.
أما الوهم، فاستعذ بالله منه.. الوهم هو الحجاب بينك وبينه.
وبعد كل ما سبق.. اسلم بالتسليم له، فالحب حرية تختارك، ولا أحد يختارها.