أجرت الحوار: مي فرج
الفنون في حالة تطور واستمرار، وأي عمل مصنف فنيا أو حتى غير مصنف وقت ظهوره هو نتاج ذات أدوات الإبداع التي يستعملها أي فنان يمارس فنا مصنفا ومعروفا، ولكن تلك المنتوجات الفنية قد تختفي وتحديدا في مصر، فإن فكرة الأرشفة أو التدوين تواجه أزمة لكونها مصدرا للثقافة سواء أصبحت من رموز التاريخ أو حتى لازالت معاصرة. والاهتمام بهذا التدوين من قبل الفنان تحديدا لا يقتصر على منتوجاته الفكرية والفنية فحسب، بل يصل إلى شغفه بل خوفه على ضياع أي منتج فني آخر لغيره من الفنانين في ثنايا جدران التاريخ والعصر المنطلق التكنولوجي. ومن هنا ظهر شغف مجموعة من الشباب الذي ترجم عمليا في إنشائهم لمجلة \”ترام\” والتي أصدرت أولى أعدادها في شهر مارس من العام الحالي، وكان لهذا الشغف امتزاج مع الخوف على الفنون كافة من زاوية لم نرها حقا على مر الزمن والتي كانت في محلها وفقا لما استطلعته من منطقهم ودوافعهم، فكان حواري مستهلا بالآتي:
– ليه \”ترام\”؟
-الفكرة من \”ترام\” هو ربط رمز بيمثل الشارع المصري وبين عاطفة أو علاقات الناس بيه، والترام يعتبر مثل قوي لده.
– اهتمامات كل فرد في الفريق بالفن بدأ إزاي لوحده قبل ما يقابل الفريق؟
– أكرم ويليام بدأ اهتمامه بالفن من ساعة ما الألعاب القديمة زي الأتاري والقصص المصورة والكوميكس ابتدوا ينتشروا في مصر، من حبه فيهم كان عايز يخليه جزء من العمل فيهم، وابتدى بعديها الاهتمام بالجرافيك ديزاين بالرغم من التحاقه بكلية صيدلة،
سمر عزمي بدأت التصوير بفعل اهتمامها بنمط الشارع والأماكن غير المعروفة أو اللي مهمل الاهتمام بيها. وأسلوبها يشتهر بالتصوير المونو كروم أو الأبيض والأسود.
– في \”ترام\” بتهتموا بتدوين أي نوع تحديدا من الفنون؟
ترام بتهتم بتدوين أي نوع من الفن سواء تصوير أو رسم أو نحت أو غيره، مفيش أي فن يستثنى في المجلة وفي نفس الوقت مش بتهتم بفن واحد أو بتتحيز لفن بعينه، لإن كل فن يحترم.
– هل \”توثيق وتدوين كل ما هو فني ومصري\” بيواجه مشكلة أو إهمال ما كثقافة استدعت إنشاء \”ترام\” للقيام بالمهمة دي؟
ده حقيقي، إحنا بنحاول نكثف كل جهدنا أن المشاكل الحقيقية اللي بتواجه الفن المعاصر تكون مدونة وكلها تحت سقف واحد، لأن مفيش منصة ثقافية معروفة بتجمع كل القضايا الفنية أو بتعرض شغل فنانين غير معروفين، وده خطر حقيقي، لأن كل الفن ده معرض للزوال مع الوقت بسبب عدم تدوينه أو مشاركته مع المجتمع، وده هدف المجلة في الأساس
– إيه هو تعريفكم لـ \”تدوين كل ما هو فني\”؟
المقصود هو عرض كل القضايا والأعمال الفنية اللي مش بتلاقي اهتمام من الميديا الظاهرة وبيتم تهميش أعمالهم ومجهودهم بسبب تسليط الضوء على أحداث غير مهتمة بالفن أكتر.
– شايفين إن المصريين فعلا مؤمنين إن الفن هو وسيلة التغيير للمجتمع؟ وإزاي؟
إحنا منقدرش نحكم أو نتكلم بالنيابة عن حد، لكن إقبال الناس على المجلة معيار كافي يثبت إن الناس عندها اهتمام كبير جدا بالأحداث والقضايا الفنية في مصر.
– المجلة بتخاطب أي فئة من الجمهور؟
المجلة بتستهدف جميع الفئات العمرية والمهتمين بالفن في العموم سواء كانوا فنانين أو لأ، مش بتقتصر على المجال الفني فقط.
– ليه المجلة بالعامية؟ وهل ده له علاقة بتبسيط المحتوى كهدف لتوصيل موضوعات المجلة للجمهور؟
لإن دي لغة الشارع المصري حاليا والكلام بالعامية هدفه نقل الحالة دي وفي نفس الوقت سهولة الاطلاع على المجلة مهما كان السن، الكلام بالعامي بيوصل مصداقية الرسالة.
– ليه استعنتوا بفناني الكاريكاتير والكوميكس بشكل كبير وواضح في العدد الأول من \”ترام\”؟
لإن عدد المهتمين بالمجال ده في مصر كبير جدا وللأسف المجال ده رغم انتشار القائمين عليه مش واخدين حقهم بالمرة في نظرنا، فكان واجب على فريق العمل تسليط الضوء على الفجوة دي.
– هل محتوى \”ترام\” هيعتمد (سواء في العدد الأول أو الأعداد القادمة) على المحتوى المرئي أكثر من النصوص؟
بنحاول نوازن بين الفن البصري والنص المكتوب لإن الاتنين ليهم أهميتهم في التدوين وفي نفس الوقت بدون جعل قراية المجلة مرهق أو طويل فبنوفر ده من خلال تعزيز الأعمال الفنية بالمقالات والقضايا المهمة اللي تهم القراء.
– ليه العدد الأول من \”ترام\” ركز على أعمال فنانين شباب؟ وهل شايفين إن توثيق الفنون هو الأهم بالنسبة للفنون الحديثة أكتر من الفنون الموجودة من زمان؟
مفيش سبب معيّن للتركيز على الفئة العمرية، لكن لو ده حصل فبيكون بالصدفة، ومع ذلك الشباب والفنانين دلوقتي بينهم المعروف وغير المعروف، مش متعارف عليهم للمجتمع الفني المعاصر على عكس الفنانين الأكبر سنا واللي ممكن يكون عندهم تواجد فني أكبر، أما بالنسبة للتوثيق للفن الحديث فهو مهمش بدرجة مخيفة وده بيخلينا مركزين في الفن المعاصر أكتر، ومع ذلك إحنا بنهتم بالفنون القديمة ولكن اللي ممكن تكون غير معروفة أو محدش اهتم بيها ساعتها.
– بتختاروا الفنانين اللي تناقشوا أعمالهم إزاي وإيه معايير الاختيار؟
الاختيار بيتم عن طريق القضايا الموجودة حاليا في المجال الفني والفنانين الشغالين فيها، والفضل في ده إن جميع العاملين على المجلة كلهم فنيانين من خلفيات واهتمامات مختلفة.
– المجلة هتتنشر كل قد إيه؟ وهل هيكون لكل عدد موضوع محدد؟
هيتم إصدار عدد جديد كل شهرين، والمجلة غير مرتبطة بموضوع معيّن بل أحداث بتحصل في الفترة الزمنية اللي بيتم إصدار العدد فيها أو في الإطار ده.
– هل فيه خطة لإصدار \”ترام\” بنسخ مطبوعة في المستقبل؟
معندناش أي تفاصيل أو خطة في الوقت الحالي عن الطباعة بالرغم من وجود أكتر من عرض للنشر.
– من وجهة نظر كل عضو في فريق \”ترام\”، إيه أكبر مشكلة بتواجه الفنون في مصر، تحديدا اللي ظهرت حديثا زي الكاريكاتير، الجرافيتي، الستاند أب وغيرهم؟
فريق العمل كله متفق على رأي واحد وإن أخطر حاجة ممكن تكون بتواجه الفن الحديث في المطلق هو ضعف المحتوى والجودة وتهميش دور كل فن فيهم وده ليه تأثير سلبي قوي على الجمهور المتابع، واللي بيخلي فيه وجود حالة من عدم الاهتمام بالفن في المطلق.
للاطلاع على العدد الأول من المجلة كاملا، والتعرف على فنون جديدة أو فنون معروفة ولكن بلمسات وإضافات شبابية مختلفة، استمتع بهذا الرابط.