\”هو أنا عايزة أرتبط ليه؟\”، السؤال اللي أغلب البنات مش بيفتكروا يسألوه لنفسهم غير متأخر للأسف، واسمحولي إن المقال حيبقى موجه للبنات تحديدًا رغم إن الولاد هم كمان بيقعوا في نفس الغلطة، بس على الأقل أنا حعرف أشرح وأتخيل إيه هي مشاكل البنات.
السؤال ده له أكتر من إجابة وبتختلف باختلاف احتياجات البنات، بس خلينا نركز النهاردة في السبب العام والإجابة اللي المفروض إنها غالبة، وهي: \”عشان أكون مبسوطة\”.. عايزة ارتبط عشان أحس معنى الحب اللي عشت طول عمري أسمع عنه بس، عايزة أرتبط عشان يكون فيه حد مهتم بيا ومالي حياتي طول الوقت.
عايزة أرتبط عشان زهقت من حياتي اللي عايشاها دلوقتي وحساها بقت فاضية قوي ومافيهاش جديد، عايزة أرتبط عشان أخرج وأتفسح وأصنع مع شريك حياتي ذكريات جديدة عليا، عايزة أرتبط عشان أتجوز وأكون أسرة وحياة جديدة، عشان نفسي أجري حافية على البحر وأعمل فوتو سيشن في إسطبل خيل ويجيلي خروف في العيد وأكتب على البروفايل Keep calm and love Mido، كل دول معناهم حاجة واحدة بس.. \”أبقى مبسوطة\”.
بس في الحقيقة بقى، هل كل بنت دخلت في علاقة حب أو اتخطبت أو حتى اتجوزت عشان خاطر الحاجات دي، حققتها في الآخر وبقت راضية عن حياتها؟
البنت اللي بتنام كل يومين معيطة عشان متخانقة مع الولد اللي بتحبه على كلمة أو موقف أو صورة أو قمصة على حاجة قديمة لسه ماتصافوش عليها من وقتها، كده عايشة مبسوطة؟
اللي خطيبها اشترط عليها تسيب الشغل وتعيش مع مامته في بيت واحد عشان هي محتاجة رعاية وهو كمان محتاج \”ست\” في البيت، مبسوطة؟
البنت اللي بقالها شهور بتفض خلافات بين أهلها وأهل عريسها عشان خاطر طلبات ومصاريف تشطيب الشقة والجهاز، مبسوطة؟
البنت اللي بتحب خطيبها ومصدقة إن هو بيحبها، وفي نفس الوقت شاكة إنه بيعرف عليها بنات تانيين من باب التسلية، بس مش قادرة تمسك عليه حاجة أو تواجهه بشكها فيه، مبسوطة؟
اللي قعدت تحب ولد سنة واتنين، وهي مستنية إنه يفاتحها في إنه ييجي يتقدم لها رسمي وهو برضه ما بيقولش وهي خايفة تطلب ده لاحسن يتهمها إنها ما بتحبهوش وإنها كانت عايزة أي عريس والسلام، مبسوطة؟
البنت اللي اتقدملها عريس نازل من الخليج عايز يخطب ويجهز ويتجوز في أقل من سنة، عشان ياخد العروسة ويسافروا تاني يكمل تحويش فلوس، مقابل إن هي تبعد عن أهلها وأصحابها وشغلها وكل حياتها عشان تروح مكان عمرها ما اتمنت تعيش فيه، مبسوطة؟
لكل بنت مش راضية عن شكل حياتها بعد الارتباط، لكل بنت حلمت بحياة معينة بمواصفات في خيالها ولما دخلت في الجد ما لقيتهاش، نفسي أفهم.. إنتي ليه مكملة؟؟؟
إنتي قررتي تخوضي التجربة دي عشان تكوني في نهاية الحكاية مبسوطة، بس ما بقيتيش مبسوطة ولا مرتاحة ولا مطمنة، يبقى إيه هو السبب اللي ممكن يخليكي تكملي في علاقة مسببة لك نكد أو ألم أو مجرد قلق؟
ممكن حد يقول \”عشان أنا بحبه ومش حقدر أبعد عنه\”، حقولها لو حبيبك مش قادر يوفرلك السعادة ولا يطمنك على بكرة معاه، يبقى أكيد ده مش حب، ولو احتمال تكون فعلا حباه النهاردة، برضه لما تزيد الضعوط ومشاكل الحياة درجة كمان، أكيد مش حتفضلي تحبيه، لأن من وأنتم على البر ماكانتيش عارفة تبقى مبسوطة بجد.
ممكن واحدة تاني ترد \”عشان هو فيه مواصفات كتير حلوة وكده كده مفيش حد مافيهوش عيوب\”، دة حقيقي جدًا مفيش حد مافيهوش عيوب ومفيش علاقة مثالية 100%، بس كل ده ما ينفيش برضه النقطة اللي واقفة عندها ولا السؤال اللي بسأله: هل أنتي مبسوطة وأنتي معاه ولا لأ؟ لو فيه بدل العيب عشرة، بس كلهم مش مأثرين في درجة رضاكي عن علاقتكم ولا درجة حبك ليه ولا مانعين إنك تحسي بالفرحة كملي، ولو العيب اللي فيه أو في أهله حيخليكي مكملة الحياة وأنتي بشكل عام مش مبسوطة، يبقى إيه فايدة العلاقة دي كلها وإزاي متخيلة بقى شكل مستقبلك؟
أما الإجابة الأخيرة وأكتر واحدة فيهم تدعو للشفقة اللي تقول: \”عشان دي فرصة ويمكن ما تتكررش، عشان كل أصحابي اتجوزوا ومافاضلش غيري وخايفة لاحسن أعنس\”، دي مش حقولها غير إن \”حياة وحيدة أحسن بكتيــــــــر من حياة تعيسة\”، ولو مش مصدقاني اسألي أي واحدة اتطلقت تعرفيها من قريب أو من بعيد \”لو رجع بيكي الزمان كنتي اتجوزتي ولا لأ؟\” وشوفيها حترد تقول إيه.