هعمل إيه يوم 25 يناير.. هعمل إيه يوم 25 يناير؟ إيه السوأل الحوسة ده؟ والساعات بتعدى والكلوك بتتوك ولازم ارد على دعاء سلطان.. علشان صديقة بحبها وبحترمها وممكن افضفض معاها.
أنا زيي زي ناس كتير أوي من ابناء يناير الغالية، واخدة قرار إني مش هنزل اتظاهر يوم 25 يناير ده، وكل أسبابي هي أسبابهم، اللي شكلناها دون اتفاق تقليدي، لكن بوعي جمعي مخيف في تناغمه, بس عمرى ما هازايد على اللي واخدين قرار مغاير بالنزول.
بالعكس، قلبى هيبقى واكلني عليهم جدا، وهصلى وادعي ليهم.. ممكن حد يشوف دي خيابة.. بس مابقتش اقف أوي عند تقييماتنا لأفعال ونوايا بعض.. إحنا ابناء يناير لما بنتاطحن, مطاحنة بتنضجنا جميعا بمنتهى الحب.. طب هعمل إيه؟!
من فترة طويلة وأنا بانقذ قطط الشوارع، وبيتي اتملا بيهم, مش هقول العدد, ومن فترة جارتي الحبيبة سمحت لي انزل حبة منهم في المكان اللي أنا بقيت اسميه الـ secret garden لأنه جنينة جميلة جدا متسورة وجارتى وأنا بس اللي معانا مفتاحها.. الجنينة دي هي المكان اللي ربنا اهداه لي.. اللي بالاقي فيه سلامي مع قططي.. باقعد معاهم نتشمس كل يوم وساعات باروح في نوم عميق جمبهم في الجنينة، وباحلم بأمي وابويا وخيالات شبه خيالات ماركيز.. مزيج من الورد والأشباح والقطط.
الحمد لله مفيهاش دم.. هعمل إيه يا دعاء؟! هازرع ورد بلدي يا ستي للشهداء ولجارتي ولقططي.. كل سنة وإحنا بنطمن على بعض يا دعاء.. با بنت يناير الحبيبة.. هازرع ورد بلدي للطيبين.