بنسمع كتير فى الأيام دى بالذات، عبارة ماتتكلمش، فى السياسة، على اعتبار إن الكلام فى السياسة لا بيقدم ولا بيأخر ووجع دماغ وقلب، وبيودى السجن طبعًا.
لكن فيه اعتبارات كتير لعدم كلامك فى السياسة. وعلى طريقة حسن حسني فى \”غبى منه فيه\”، إسمحلى أبسطهالك.
1- ماتتكلمش، عشان فى نظر ملايين من شعبنًا العظيم كلام مدحت شلبى وفاروق جعفر (خلينًا نتكلم كفنيين) أهم منك ومن كلامك.
2: ماتتكلمش، عشان البلد دى من زمان جدًا وهما بيتكلموا وبيهتفوا وفيهم اللى إشتغلوا سياسة وماوصلوش لحاجة فى الآخر.
3- ماتتكلمش، عشان ماتلاقيش راجل كبير وهيبة كده بيتحول لزومبى قدامك ويقولك (يعنى إنت هتفهم أحسن من السيسى!)
4- ماتتكلمش، لاحسن تلاقى نفسك بترد على كلام أحمد موسى ومصطفى بكرى.
5- ماتتكلمش، وإضحك وخلاص، لإن كلامك هييجى إيه جنب كلام محامى الحكومة اللى قالك تيران وصنافير سعودية.. ولا هييجى إيه جنب كلام مرتضى منصور اللى قالك الناس زعلانة عشان توفيق عكاشة ممنوع من الظهور.
6- ماتتكلمش، عشان اللى كانوًا بيتكلموا فى السياسة والتوك شو زمان، دلوقتى واحدة فيهم بتستضيف الكوميديان حمدى المرغنى، والتانى اعتزل الظهور أصلًا.
7: ماتتكلمش، لإنك مهما اتكلمت، كلامك مش هييجى ذرة جنب كلام الرئيس فى خطاباته.
8- ماتتكلمش، مع حد فى السياسة وخصوصًا لو مختلف معاك.. أولًا: عشان مابتسمعوش بعض أصلًا، وثانيًا: عشان بتتخانقوا فى الآخر.
9- ماتتكلمش، عشان الكلام الوحيد اللى له تمن ووزن هو (مؤامرة /النكسجية / أحسن من سوريا والعراق / سكر إيه؟! ما هو السكر كله / اقتصاد حرب / اقسم بالله لاجيبك بلبوص)
10- ماتتكلمش، عشان لو الكلام زاد عن حده، مش هيسمحولك تتكلم ولا تعيش أصلًا.
11- ماتتكلمش، وإضحك أحسن، لإن كوميكس أو فيديو واحد بيلخصوا كل اللى بتقوله وهتقوله.
12- ماتتكلمش، عشان يامًا اتكلمت زمان وماسمعوش كلامك، ودلوقتى مش لاقيين كيلو السكر!
13- ماتتكلمش، عشان كلامك عمره ما هيكون أخطر من اللى بيعملوا ولا أكبر وأخطر من الواقع اللى كل يوم بيرزقنا بمصيبة نتلهي فيها.
14: ماتتكلمش، عشان فيه ناس عمرها ما تكلمت ولا فهمت، ودلوقتى بتتحاكم.
15- ماتتكلمش، عشان الناس فى البلد دى بتسمع وتصدق إتنين.. واحد لابس كاكي، والتاني لابس دقن وجلابية.
***********
ده كلام الواقع والظروف والعيشة واللى عايشنها.. كلهم بيقولولك ماتتكلمش.
لكن لو عايز رأيى أنا بقى.. إرمى كل اللى قريته ده فى الزبالة، لأنك لازم تتكلم.. أولًا: عشان إحنا مانملكش غير الكلام، وثانيًا: الكلام بيهزهم.. أى كلام كبير.. صغير، مهم.. تافه، وأى تغير حصل فى مصر من زمان جدًا وحتى لو صغير جدًا، حصل بسبب كلامك، وهما مابيخافوش غير من الكلام أصلًا. والأهم بقى من كلامك أو عدمه، هو إنك تتفرج.. تتفرج على اللى بينظروا عليك وبيفتوا وهما واخدين بلدك -اللى إنت فى يوم من الأيام نزلت عشان تغيرها للأفضل، ونفسك تهرب منها دلوقتى- وهما بيلبسوها فى الحيط.
ولإن الرهان الحقيقى على التغيير فى البلد دى، هو الفشل.. فشل كل اللى بتشوفهم دوول عن تحقيق أى شئ.. فشلهم حتى فى إنهم يحموا نفسهم، ووقتها الماتش هيتعاد من أول وجديد، وإبقى إلعب واتكلم براحتك.