زمان، من ١٢ سنة كده، كنت طفل مُتعب شويتين وبيسأل عن كل حاجة، عيل رخم بيسأل أسئلة مُربكة للي حواليه. كنت في رمضان دايمًا ببقى أغلب الوقت في الجامع بقرأ قرآن مع الشيخ اللي كنت بحبه جدا. وفي مرة من المرات حصلت خناقة في الجامع وسط صلاة التراويح بين اتنين واحد منهم داس على رجل التاني جامد فاتهمه إنه قاصد وبدأت الخناقة اللي اتعور فيها تلاتة. وقتها رحت للشيخ ده قلت له: هو مش الشياطين بتبقى محبوسة في رمضان؟ فقالي أيوه. قلت له: طيب ليه دول ماتحبسوش؟
فاكر بصة عينه لحد النهاردك إني خليتهم شياطين لمجرد إنهم بيتخانقوا، وقلت له إن الشياطين بس اللي ممكن يعملوا كده.
باستعجب إزاي إن في رمضان دايما الناس بتبقى عصبية أكتر وخناقهم أكتر بسبب الجوع والعطش ونقص النيكوتين بالنسبة للمدخنين، هو إنتوا مش مفروض بتمارسوا شعائر عشان تقربكم من ربنا؟ الشيخ اللي كنت بحبه ده قابلته في رمضان بيشتم حد في الشارع لأول مرة في حياتي وبرر ده بإنه صايم ومتعصب وده هز ثقتي فيه جدا.
السؤال هنا: هو مش أولى قبل ما نصوم علشان ربنا، نبقى بشر عشان ربنا ونكون أشخاص محترمين بيحترموا نفسهم ويحترموا غيرهم؟
مش أولى نعرف إزاي نكون نماذج مشرفة للناس حوالينا؟ مش مفروض وإحنا بنعمل حاجة عشان رضا ربنا نكون بنعملها وإحنا في أكتر حالات التسامح مع الناس؟
خلوني أسأل بكل جدية وبدون أي هزار: صايمين؟ صايمين ولا بتشتموا الناس في الشارع عشان متعصبين وعطشانين ومش طايقين حد؟ صايمين ولا بتعوضوا غياب الشياطين بشياطينكم؟ صايمين؟ ولا زي كل سنة؟