إوعى تفتكر إننا بنحب أبو تريكة عشان متربي ولا محترم ولا خلوق ولا الكلام الفارغ ده.. إحنا حبناه عشان كان بينكد على الزملكاوية أمثال أصدقائي باسم شرف وعمرو إمام ويخلينا نقعد نتريق عليهم وعلى أمثالهم، والدمعه تبقى هتفر من عينهمن وفي المقابل كنا إحنا بنبقى فرحانيين، وحبيناه عشان كان بيجيب أجوان للأهلى وللمنتخب وبيخللي كل الناس تفرح، لكن موضوع التربية ده.. مابياكلش معانا.
يعي مثلا أنا ليا واحد صاحبي خلوق ومتربي، بس مابيعرفش يجيب أجوان، ولا بيلعب كورة من الأصل، وبالتالي مابيعرفش يفرح الأهلوية ولا ينكد على الزمالكوية، وأنا مابحبوش أساسا لأنه مع طيابته نحنوح، وأنا مابحبش النحانيح.
وكمان أنا بحب الأطفال أوي، وكتير بشوف أطفال نفسهم يطلعوا زى أبو تريكة بيلعبوا حلو، ويفرّحوا الناس، لكن ماشوفتش حد نفسه يطلع مثلا زي مرتضى منصور، ولا زي محمد مرسي، لأن لا مرسي ولا مرتضى بيعرفوا يفرحوا الناس، ولا يجيبوا أجوان زي تريكة.
وبعدين أنا ماعنديش مشكلة من انتماءاته طالما كان بيعرف يجيب أجوان حلوة، ولو تلاحظ كده هتلاقي إن أغلب اللي بيكرهوا الإخوان – وأنا منهم طبعا- زعلوا من تريكة إنه اشترك في الدعاية بتاعة مرسي، وعرفنا إنه تبعهم وإنهم هيعايرونا سنين كتير إن اللي كان بيفرحنا كان تبعهم، زي ما الإسرائيليين بيعايروا العالم كله وبيضغطوا على أي حد عشان محارق هتلر، مع إن فيه ناس كتير هتلر قتلهم وحرقهم غيرهم، ومع إن ممكن بكره يطلع لنا لاعب تاني، ويكون ملحد ويفرحنا كتير ويدخل لنا أجوان كتير في الزمالك ويضايق عمرو إمام وباسم شرف، ويخللي المنتخب يكسب، ويفرّح الشعب وننزل ميدان التحرير نحتفل ونشتري علب بيروسول ونولع بيها نار، وإحنا بنرقص ونغني زي ما تريكة خلانا نعمل بالظبط، علما بإن أغلب اللي هيرقصوا ويغنوا، هيكونوا بيحبوا ربنا وبيصلوا حاضر في الجوامع، وبيولعوا شمع في الكنايس، وبيزوروا معابد الفراعنة ومقام حتشبسوت، وبيقروا لها الفاتحة كمان.
إحنا ناس بنحب اللي يفرحنا أيا كان مين، وبنزعل من اللي بيزعلنا ويقطع عننا النور ويغللي علينا الأكل والشرب والماية والكهربا والغاز والبنزين والعيش، سواء كان خروف أو شتلند.. إيمانا منا بمبدأ تعددت الأسماء والفعل واحد.
أنا مابفهمش في الكورة ومابحبش الإخوان ومابحبش اللي اتخورفوا (بقوا خرفان) لأي حد، ومابحبش العجة أم بيض ولا السوشى ولا الخبيزة ولا القلقاس، ولا بحب اقرأ محمود درويش ولا اسمع عود نصير شمه ولا الجمل المنحنحه بتاعة أحلام مستغانمي أو عمرو خالد، ولا بحب إسلام بحيري ولا مرتضى منصور، ولا بحب حاجات كتير من اللي الناس بيحبوها.. بس بحب أوي فرحة الناس، وتريكة فرّح الناس.. إذا أنا احب أبو تريكة.
الله
الوطن
الانبساط
