كل سنة وأنت طيب.. إحنا في شم النسيم خلاص.. كُل فسيخ ورنجة واتشقلب، ولو تعرف تخطف لك ساعتين تلاتة برة القاهرة.. اخطف، حتفرق معاك.
اتبسط فشخ، بس حانحط مع بعض شوية قواعد كده عشان اليوم يعدي والكوكب يستحملنا سوا من غير خسائر كونية:
الفسيخ زي الجنابة عند الرجالة.. لازم تستحمى بعده مباشرة.. أول ما تضرب فسيخ.. تستحمى الله لا يسيئك.. اعتبر نفسك جُنُب أو جربان، وش كده.. وافرك قشرة برتقانة في إيدك وادعيلي.
المواطن المصري لما بيحب يضرب فسيخ ويضيع ريحة بُقه، بياكل بصل، وبعده نص ليمونة، ثم طبق مكرونة، وكوباية شاي تقيل أو قهوة وسيجارة سوبر عشان يحبس.. تخيل بقى كومبو روايح البكابورت.. معجون سنان وكلورتس أو اكسترا مينت أخضر وارحم ميتين أبونا.
يوم شم النسيم عادة بتبقى معزوم عند ناس أو أنتوا عازمين ناس، وغالباً بتلاقي طانط كبيرة في السن (خالتك – عمة أبوك – بنت خالة أمك – إلخ)، قررت تسيب بطن الفسيخة اللي بتنحت فيها وتبوسك عشان أنت كبرت وشنبك خط في وشك ولا أي هباب.. دي ماتحاولش تتجنبها.. سيبها تلحوسك وبعدين اغرز وتد خشبي في قلبها أو اشنقها بسلبة من اللي بيربطوا بيها العربيات على الونش، أو حطلها سيانيد في علبة دوا القلب.
بعد الفسيخ، حاتعوز تشرب حاجة: يا مية.. يا شاي.. يا حاجة ساقعة مشبرة، مفيش أم عصير جوافة ولا مانجا.. خالص.
نص اليوم التاني حتقضيه في حالة غيبوبة غالباً، يا تنام شوية يا تتهد وتقعد في البيت.. متنزلش الشارع مصرصر وتقرفنا.
كونك تسلم عليا وأشوف قشر سمك بين سنانك، ده مبرر كافي إنك تتقتل أو يتداس عليك بمقطورة زلط أو تلاقي مرفوع عليك قضية وناجي شحاتة اللي حيحكم فيها.
الفسيخ بيتاكل بإيدك مش بشوكة وسكينة.. دي أكلة زفرة مفيهاش أي نوع من الستايل أو الروشنة.
ريحة الفسيخ بتلزق في الهدوم.. كل الملابس المستعملة وقت ارتكاب الجريمة، تذهب رأساً إلى الدراي كلين أو محطة إعدام النفايات.
استحمى برضه.. رش برفان أو مزيل عرق على كل جسمك، وعيش وسيب غيرك يعيش.