فيه ناس كتير بتحاول تنظم ثورة.. الظريف هو إن أهم عناصر ثورة يناير هو إنها ماكانتش متنظمة.. الثورة الحقيقية هي اللي تظهر في أعمق لحظات القهر بشكل عفوي.. بس ده ما يمنعش إننا نفضل نتكلم ونفكر الناس بثورة يناير.. أنا شخصيا بما إني حكون في لندن في الوقت ده، فاحنزل، عشان نقف قدام السفارة المصرية في لندن، عشان نفكرهم بالثورة، وباللي بيحصل للنظام لما يفتري على شعبه، يمكن يتعظوا. النشطاء الثوريين الأصليين في لندن متعودين ينزلوا كل سنة في ذكرى الثورة قدام السفارة، وكمان بينظموا فاعليات ووقفات كتير عن المعتقلين وقضايا كتير.. فيه كمان نشطاء بيروحوا يقفوا كل يوم قدام السفارة المصرية شايلين يافطة عليها رسالة للنظام, عمرهم ما يأسوا أو زهقوا. مهم جدا إننا نفضل نتكلم عن الثورة برة مصر وجواها.. مهم جدا إننا نوصل فكرة الثورة بلغة بسيطة للناس في مصر.. عشان يعرفوا حقوقهم ويطالبوا بيها.. العمل الثوري مش كلة مظاهرات في الشارع, العمل الثوري بيكتمل بإحداث عنصر التغيير حتى لو حيحصل على المدى الطويل.
مع إني لا أميل شخصيا لأي نزول في الشارع في مصر وإتاحة الفرصة للنظام انه يتصادم ويتلكك ويعلق فشله على المظاهرات، لكن في نفس الوقت أنا مع الحق في التظاهر لأي حد قرر إنه ينزل ويتظاهر، وحادافع عنه بأي شكل.. هما حاليا بيأمنوا وسط البلد ومنزلين فيها مدرعات ودبابات وبلاوي.. شيء يدعو للشفقة لما تشوف النظام وهو مرعوب كده، وهو أصلا مفيش دعوات حاشدة للنزول يوم 25 يناير.. النظام عايش في حالة رعب من حاجة مجهولة، وخايفين إن اللي حصل مع مبارك يحصل معاهم تاني.. ما يعرفوش إن لو يوم الثورة جه.. كل ده مش حينفعهم، زي ما مانفعش مبارك قبل كده.