قالولنا زمان إن \”الدستور\” دي كلمة فارسية معناها أبو القانون, لكن يبدو أن معناها حاليا عند الحكومة المصرية هو أبو أم القانون. واضح جدا توجه النظام الحالي في التلاعب بالقانون والتشريع حسب المزاج في غياب البرلمان, لكن أن يصل الكلام لمرحلة التلميح لتعديل الدستور, فده شيء مستفز جدا وغير مقبول.
في كلمته في افتتاح أسبوع شباب الجامعات, صرح الرئيس عبد الفتاح السيسي بأن \”الدستور منح بنوايا حسنة صلاحيات واسعة للبرلمان، والبلاد لا يمكن أن تدار بالنوايا الحسنة فقط\”. طبعا الكلام ده فيه إهانة كبيرة للجنة الخمسين إللي صاغت الدستور وإفتراض إنهم ماعندهمش فكرة هما بيعملوا إيه، وكانوا بيكتبوا بحسن نية اللي في قلبهم, وده كلام مايطلعش من رئيس جمهورية بصراحة يعني.
المشكلة إن لما تفكر في الكلام ده، لازم حتوصل لاستنتاج إن الرئيس خايف من حاجة في الدستور ده, بيتمنى إنه يكون حاجة مختلفة لغرض ما، وبتبين إن الرئيس عايز يمشي البلد على مزاجه من غير أي مضايقة.. طيب نروح نشوف كده إيه في الدستور اللي ممكن يكون بيضايق سيادة الرئيس ومعكر مزاجه.
أول حاجة طبعا واضح إن الرئيس لما اتزنق في حوار البرلمان ده اللي بقاله فترة بيحاول يتجنبه, أضطر إنه يلقي نظرة على الدستور ويشوف يعني طالما كده كده حيبقى فيه برلمان، فنشوف آخره إيه يعني.. بيفتح الدستور وخير اللهم إجعله خير لقي في وشه مصيبة يا معلم. البرلمان اللي جاي ده طلع عنده صلاحية إنه يعزل الرئيس.. طبعا أنا لا ادعي إني باقرأ الأفكار، بس أنا متأكد إن رد فعل الرئيس بعد ما قرا المادة دي، هو كلمة من تلات حروف. وبناء عليه، بدأت الأفكار تلعب في الدماغ, بس كتر خير الدنيا إنه قال \”نوايا حسنة\”، وإلا كان زمانه قابض على أعضاء لجنة الخمسين وبيحاكمهم بتهمة التخطيط لقلب نظام الحكم.
طبعا الكلام ده ماياكلش مع رئيس عسكري مالوش أصلا لا في ديمقراطية ولا سلطات تشريعية ولا سيادة قانون ولا أي كلام من ده.. ما إحنا كويسين من غير برلمان أصلا والناس مبسوطة, قوم عشان حتة دستور أجيب لنفسي وجع الدماغ, لا وكمان قطع عيش وإحنا لسه بنقول يا هادي.
تاني خازوق يا برنس طلع بقى قال إيه الدستور ده بيسمح للبرلمان إنه ممكن يشارك رئيس الجمهورية في تشكيل الحكومة ومراجعة اختيار رئيس الجمهورية لرئيس الحكومة و كمان سحب الثقة من رئيس الحكومة.. يعني الرئيس يتعب ويشقى عشان يلاقي وزرا هو شخصيا يقدر يستحملهم, فييجي البرلمان كده بكل بساطة يفركشهم! لأ طبعا.
تالت حوار ماجاش على المزاج هو إن الدستور بيقول إن البرلمان لازم يراجع كل القوانين اللي صدرت من رئيس الجمهورية في فتره غياب البرلمان والموافقة عليها، وإلا تصبح لاغية بأثر رجعي.. يعني بعد كل التعب ده في قوانين جميلة زي قانون التظاهر وقانون مكافحة الارهاب وقانون الكيانات الارهابية ييجي شوية ألاضيش يعدلوا عليا! عيب أوي.
وبما إن كده كده حنعدل الدستور طب ما بالمرة بقى نزود مدد رياسة الجمهورية أو نخليها مدد مفتوحة أصلا, عشان نبقى ظبطناها تمام, أصل مش كل شوية حنعمل تعديل صغير, إنزل بالباكيدج كاملة.
للأسف مفيش حد بيتعلم من التاريخ, كل ما رئيس بيلعب في الدستور، بتيجي نهايته بعدها بسرعة جدا, ولنا في موضوع \”مدد\” السادات وتعديلات مبارك بتاعة 2007 عبرة.. فيه حاجات كده اللعب فيها عيب, فأرجو إن ما حدش يلعب في الدستور, واللي يلعب في الدستور ما يخلاش من الهاردكور.