بعد حادث غرق مركب رشيد واللي راح ضحيته 154 شخص حتى كتابة هذه السطور، ظهر فجأة تيار جديد من المنظّرين بوجهة نظر غريبة وهي لوم الضحية! مع إن دي مش أول حادثة من نوعها، بس التوجه الجديد ده ظهر فجأة بعد الحادث الأخير، والغريب إن الكلام ده مش بس من المحسوبين على النظام، لكن من ناس أفكارهم معتدلة ولهم مصداقية.
الكلام مجمله بيقول إن الغلطة غلطة الشباب اللي قرر يخاطر بحياته سعيا ورا ثراء سريع بدل ما يقعد في مصر يكد ويجتهد لحد ما يحقق الثراء ده.. كلام برضه عن إن الناس دي دفعت للمهربين 30 ألف جنيه عشان يهربوهم في المركب، بينما كان ممكن يستغلوا الفلوس دي في مشروع يكسبهم دهب، وطبعا اتعملت مقارنة بينهم وبين السوريين اللي هاجروا لمصر اللي بيغزلوا برجل حمار! وفيه أعضاء في البرلمان وللأسف في لجنة حقوق الإنسان قالوا تصريحات من نفس العينة، وبرضه قالوا حلم الثراء وإن اللي بيهاجر غير شرعي ده عايز يبقى ثري ويجيب عربية وشقة!
أبسط كلمة تتقال عن الكلام ده هو إنه صادم وبشع! مصر مستوى الفقر فيها وصل لمرحلة حرجة، وكل اللي بيهاجروا دول من الطبقة الفقيرة ويمكن المعدمة، فقبل ما نبتدي نلومهم ونسألهم هما عملوا إيه.. خلينا نشوف إيه حقوقهم والضمانات اللي في حياتهم اللي بيتمتعوا بيها في مصر، وبعدين نشوف هما إزاي يسيبوا العز ده كله ويقرروا يهاجروا!
المصري مننا يا جدعان لا يتمتع بأدنى مستوى من الحقوق الاقتصادية، بلاش نجيب سيرة الحقوق السياسية عشان فيه ناس بتعتبرها رفاهية أصلا! فمثلا أبسط حقوقك هو إنك تلاقي شغل، في مصر حتى المتعلم تعليم عالي مش بيلاقي شغل ومافيش أي ضمانات أو التزام من الحكومة إنها تشغله.
في معظم بلاد العالم الطبيعية بيكون دور الحكومة هو إنها تشغلك، أيوة بحسب القوانين والمواثيق الدولية، الحكومة مسئولة تشغلك، وتخيل بقى إن في حالة إنها ما عرفتش تلاقيلك شغل بتعمل إيه؟ بتدفعلك بدل بطالة، آه والله! يعني في جميع الأحوال حتعيش عيشة كريمة. في مصر بقى لو الشاب الفقير من دول طحن نفسه سنين في تعليم وكورسات وبلاوي، برضه مش حيلاقي شغل، يعني الطريق مسدود مسدود يا ولدي.
غير موضوع الشغل ده مثلا فيه حاجات تانية المفروض أساسيات في أي بلد طبيعية مش موجودة برضه في مصر زي التأمينات والتأمين الصحي، فتلاقي الشاب من دول بيجري على علاج أبوه ولا أمه، وطبعا لأن مافيش تأمين صحي فلازم حد يجيب فلوس، فحلم الثراء ده مش في كل الحالات، والأغلب هما فعلا محتاجين ومافيش أمل.
ثم تعالى هنا! ثراء مين يا ابو ثراء؟ هو عشان الواحد منهم بيحلم إنه يكون عنده عربية وشقة، فده يعتبر ثراء؟ دي يا جدعان أبسط طموحات أي إنسان بيحلم بعيشة متوسطة! ما هو يعني مافيش حد بيهاجر هجرة غير شرعية ومتوقع إنه بعد سنتين حيجيب فيللا وأسطول عربيات يعني.. فـ ليه سيادة النائب بيقول كلام يستفز بيه مشاعر الناس؟!
أما موضوع إنهم ممكن يعملوا مشروع بـ 30 ألف جنيه أو 50 ألف جنيه، فأنا مش عارف إيه في البلد دي ممكن يتعمل بالمبلغ ده، وحيجيبلك كام عائد على مدار كام سنة؟! يعني مثلا لو الـ 30 ألف دول عملت بيهم مشروع رهيب وناجح نجاح رهيب، حيجيبلك مثلا كام؟ 100 ألف جنيه في سنتين مثلا ربح صافي؟ تحب نشوف بعد سنتين قيمة الجنيه حتوصل كام، عشان تعرف أنت فلوسك زادت في المشروع، ولا فعليا نقصت؟!
الناس اللي أنتوا بتقولوا عليهم مش ضحايا دول، هما اللي قرروا إنهم يسيبوا البلد اللي مافيهاش أمل ويروحوا برة يشتغلوا شغلة شريفة، لأن طبعا أي حد منهم لو فعلا شرير وطماع وبتاع ثراء سريع، طب ما كان أتجه للسرقة أو تجارة المخدرات مثلا! لكن إنك تلومهم إنهم قرروا يخاطروا بحياتهم عشان يلاقوا شغل شريف بدل ما يسرقوا ولا يتاجروا في المخدرات، فدي بصراحة بجاحة زيادة أوي.
الخلاصة، لما الشاب منهم يبقى بيتمتع بحقوقه في بلده كاملة، وحق في الوظيفة وحق في تأمينات ومعاشات وتأمين صحي.. يعني الأساسيات اللي موجودة في أي بلد طبيعية، وبعد كدة يسيب ده كله ويجري يدور على ثراء سريع زي ما بيقولوا، ساعتها بس شيلوهم الليلة، وقول عليهم كل الكلام ده.. غير كده يبقى مالناش حق نلومهم، لأنهم ضحايا، واللي حصل ده مصيبة ومسئولية الدولة الفاشلة.