الطموح حلو مفيش كلام! ولا نجاح بدون طموح، فالطموح هو السر وراء تمييز الشخص الناجح عن الآخرين وتقدمه عن أقرانه، وتفوقه عليهم، الطموح، وليست القوة أو القدرة أو الذكاء أو العلم.. تمام؟
وبعد توفر الطموح والحلم والإرادة، يأتي التميز والمهارة والكفاءة، أن تكون ملما بكل جوانب عملك، وعلى دراية كافية به.
وإذا كانت القدرة الفنية في مجالي كمصممة وتشكيلية تساعدني على الخروج بمنتج فني جيد أو مميز، فإن القدرة العقلية والتخطيطية هي التي تساعد على إيجاد رؤية لمشروع واضح متكامل، وهي التي تعمل على ربط كل أجزاء المشروع ببعضها، فغياب تلك القدرة الأخيرة غالبا ما يؤدي إلى توقف أي مشروع وفشله مهما بلغت جودة المنتج أو تفرده.
أنا بأة للأسف مخي مفيهوش الفص المسؤول عن حتة التخطيط والطموح والمشاريع والفلوس والحاجات دي، ماشي؟ عادي! عيب تصنيع! اضطراب خلقي! خلقة ربنا، الحمد لله! خلقتك شريفة يا رب!
وهو يعني ربنا خلقنا مختلفين ليه؟ مش علشان نكمل بعض ونترابط ونتعارف وكده؟ خلاص.. يبقى أنا أرسم وأصمم وأفن، والتخطيط والتخزين يبقى من تخصص الدفاس وأبو دهشوم!
وعليه.. كنت أجلس بالمكتب أمارس مهام وظيفتي المعتادة في هدوء، إلى أن فاجأتني صديقتي المهندسة المعمارية وزميلتي بالمكتب بالآتي:
هي: بت يا ساسا.. أنا عندي ليكي مشروع لووووووز.
أنا: مشروع؟ مشروع إيه؟ ما أنتي عارفاني! المشاريع والجو ده مش منطقتي خالص!
هي: هاقوللك إيه؟ ما أنتي فقرية!!! يا بت أنتي صحصحي شوية كده! أنتي شغلك تحفة، ولو ركزتي هاتعملي فلوس زي الرز!!! هبلة صحيح!!!
أنا: يا ستي ماليش فيه والله.. مش بعرف اعمل كده خالص، مش بتاعتي!
هي: إسمعي بس!!! ما أنا هاشاركك بأة!!! هي دي الزتونة.
أنا: قولي!
هي (متحمسة تحمس شديد): بصي يا ستي.. إحنا هانعمل مشروع صغير.. هانعمل مرايات، مرايات ديكور فنية كده، أظن بأة دي منطقتك!!!
أنا: تمام، أنا عملت تصميمات لمرايات كتير قبل كده.
هي: حلو جدا.. شفتهم طبعا.. تحفة!!!
أنا: تمام.. أعمل كام تصميم كده؟ وبعدين؟
هي: الله ينور عليكي.. تعمليلنا كام تصميم جامدين من بتوعك دول، وبعدين يا ستي تبدأي تنفذيهم
أنا: أنفذهم بإيه؟ بتفكري في خامات معينة؟
هي: لأ بأة دي بتاعتك.. تصميماتك وأنتي تختاري الخامات المناسبة لتنفيذهم زي ما أنتي عايزة بالظبط، أنا اللي هاقولك؟ عيب عليكي!
أنا: تمام.. أعمل التصميمات واختار الخامات.. هانجيب الخامات من حد معين تعرفيه؟
هي: لأ بأة ما أنتوا الفنانين أدرى بالناس اللي عندها أحسن الخامات وأرخص الأسعار.. كمان ممكن تسألي أصحابك.. مش هاتغلبي يعني يا ساسا!!!
أنا: تمام.. وبعدين؟
هي: وبعدين يا ستي تنفذيهم بأة
أنا: فين بأة؟
هي: فين؟؟؟ ده سؤال؟؟؟ أنا اللي هاقولك فين برده؟؟؟ مش أنتي فنانة وعندكوا أتيليه.. ظبطي بأة يا ساسا!
أنا: ماشي، تمام، صممت، ورسمت، واشتريت الخامات.. ونفذت.
هي: حلو أوي أوي.. زي الفل، تبدأي بأة تشوفي الجاليريهات التقيلة اللي تقدر الفن والشغل الجامد ده وتعرضي عليهم الشغل.. جاليريهات فنية.. مش أي كلام.. ها؟؟
أنا: آه…
هي: بس بأة يا ستي.. ونبيع ونكسب.
أنا: تمام.. خلليني كده بس أراجع معاكي الخطوات واحدة واحدة.
هي: ياللا
أنا: دلوقتي أنا هاعمل التصميمات.. واشتري الخامات من جيبي.. وادور على الصنايعية واتابعهم وأشرف عليهم.. وانفذ التصميمات…
هي: برافو عليكي.. تمام كده
أنا: وابدأ ادرس الجاليريهات.. واطارد التجار.. واغزو الأسواق…
هي: اسم الله عليكي smile emoticon
أنا:…….. و(نبيع) و(نكسب) أنا وأنتي!!!!
هي: !!!!!!!!!!!!
أنا: مش شايفة إن فيه خلل في المشروع ده؟ فكرة الشراكة مش مغلوطة عندك شوية؟
هي: !!!!!!!!!!!!!!!!!!!!!
أنا: قومي يا بنتي!!! قومي شوفي وراكي إيه، اتكلي على الله يا حبيبتي، سيبك من أحلام الثراء السريع دي وشوفي أكل عيشك!!! كلي لقمة بالحلال!!! قومي!!!!!!!!!!!!!!
صمتت صديقتي هنيهة، ثم أدركت فداحة ما قالت.. فانفجرت في هيستيرية ضحك وتركتني وهي تهمهم: \”إيه ده صحيح؟؟؟؟ ههههههههههههه\”، ثم قالت ساخرة: الحق عليا إني بفكر لك واخططلك smile emoticon
(ياللي بتقولوا الزمان ده خد وهات.. أنتوا خليتوا الزمان ده كله هات)
frown emoticon
(وناس تدي وتندم… ويا ريتها بتدي حاجة.. يا ريتها بتدي حاجة!!!!!!)