مش معقول يا ناس الحملة اللي حاصلة على وزير العدل دي.. مش صحي أبدا إن أول وزير يقول الحقيقة اللي كلنا عارفينها.. نهاجمه ونطالب بإقالته.. بلاش تأكدوا للشلة – اللي بيتم اختيار المسؤلين منها- إن الكذب هو الطريقة الوحيدة المضمونة لسكوت الشعب عنهم.
ثم تعالوا هنا.. هو مين يعني أتفاجيء بإن ابن عامل النظافة مستحيل يشتغل قاضي في بلدنا؟! مين ده اللي لسه مخلوق من نُص ساعة؟ مين ماعندهوش علم يقين إنها دايرة بالرشاوى والوسايط والمحسوبية في كافة المجالات، والمجلات كمان.. مين مش واخد باله إن مبارك -تقريبا- هو الوحيد اللي ماورثش إبنه شغلانته؟!
إحنا بلد فيها قانون لتعيين \”أبناء العاملين\”.. يعني توريث بشكل قانوني تماما، ثم هو مين نسي حالات الانتحار بسبب الرسوب في كشف الهيئة الخاص بوزارة الخارجية، ومين أساسا مش عارف كشف الهيئة -في مختلف الجهات- وشروطه الطبقية، مين ماعرفش بتعيين 3 أشقاء في النيابة في نفس ذات الدفعة؟ مين مش عارف إن الكلية الحربية أو الشرطة أو النيابة الأولوية فيهم لأبناء كبار الرتب والقضاة.. ثم الأقارب.. ثم المعارف.. ثم من استطاع إليه فلوسا.
بلاش نهاجم أول وزير اتكلم بصراحة.. خليهم يطلعوا اللي عندهم ويجيبوها على بلاطة بقى، وإن كان على مخالفة الدستور، فبلاش نتحمق قوي كده على الراجل ما دمنا مصهينيين على غيره كتير.. إحنا عندنا شباب واخد أحكام بالسجن المؤبد طبقا لقانون اسمه \”قانون التظاهر\”، وهو قانون غير دستوري وأساسا غير منطقي، كفاية إنه بيشترط تبليغ منظمي المظاهرة بعدد المتظاهرين، وصلِ على رسول الله.
إحنا عندنا جهاز إداري في الدولة اسمه \”الرقابة على المصنفات الفنية\”، وفي نفس ذات الوقت عندنا في الدستور -مادة رقم 67- أول جملة فيها بتقول \”حرية الإبداع الفني والأدبي مكفولة\”.. عندنا قرار من رئيس الجمهورية رقمه 444 لسنة 2014 لتنظيم التعامل مع المناطق الحدودية، القرار ده لوحده بيعارض أكتر من مادة دستورية، مادة 62 اللي بتكفل حرية تنقل المواطنين في وطنهم، ومادة رقم 263 الخاصة بعودة أبناء قرى النوبة لأراضيهم، لأن القرار بيقص من أراضي القرى دي أكتر من 100 كيلو متر، والعظيم أن ده بحجة مكافحة الإرهاب في سيناء، وزي ما كلنا عارفين إن سب الدين حرام.
من الآخر.. إحنا اللي مكبرين الموضوع، وبصراحة بصراحة يعني.. إحنا مش منطقيين، لأن مفيش منطق بيقول إني أبقى داخل مسرحية عبثية، وأنا عارف إنها عبثية، وفجأة أقفش في جملة منها وأعترض عليها بوصفها غير منطقية.. ده حتى يبقى إضطهاد للممثل صاحب الجملة دي.
ليه ماشوفتش الهبة العظيمة دي يوم ظهور الإعلان الدستوري بتاع المجلس العسكري، هي مش الخناقة كانت على تعديل 9 مواد في دستور 71، يا رجال ده شعب عمل ثورة.. ثورة، يعني كفر بكل أجهزة الدولة وآلياتها وقرر يتدخل بنفسه بقى، وفجأة ساب القضاة \”اللي هو عارف إنهم معينين بالوسايط والرشاوى\” يحاكموا السياسيين الفاسدين طبقا للقوانيين اللي حطها السياسين دول نفسهم، إعتمادا على أدلة مقدمة من وزارة الداخلية \”السبب الرئيسي في ثورة الشعب\”.