سلوى.. أختي…
أجمل بنت في مصر..
البقية في حياتكم
كنت في مطار في اليونان لما كلمني طارق اخويا و قال لي
الحق يا خالد.. سلوى يا خالد..
سلوى أختنا..
خطفها حريق النهارده.. لما رجعت بنفسها داخل الحريق.. بيقولوا في محاولة عشان تنقذ قططها.
…
كأنه امبارح لما كنت “دودي” اخوها الصغنن اللي ماسك إيديها وسلوى واخداه معاها النادي يتفرج علي تدريباتها أو ماتشاتها في الباسكت والهاندبول في نادي هليوبوليس أو تاخده معاها مع الفريق في سفريات حول العالم.
كنت أخوها الصغنن “دودي” اللي ماحدش يعرفه، وكنت باسمع كل التعليقات اللي بتحسدها علي جمالها وحبها والتزامها الرياضي.
دايما فخور بيها زي كل اخواتي الكبار.
كلهم.. فخور بيهم
كلهم رياضيين..
كلهم جمال..
كلهم يشرفوا مصر كلها..
وغالبا كانوا السبب إن أنا كمان حبيت اكون زيهم..
سلوى أبو النجا.. بطلة الهاندبول والباسكيت.
أجمل واحدة شفتها في حياتي.
اتخطفت.
مش بس الموت اللي بيخطف..
الإكتئاب بيخطف.. بيخطف عشان الناس بتخذلنا فبنوصل لدرجة ان مفيش بكرة نصحى له.
الحزن بيخطف.. الحزن بيخطف عشان بنحب ناس بيتغيروا وبيبقوا ناس تانيين!
الحزن بيخطف عشان بيحبنا ناس زي ما كنا في يوم بس إحنا بنتغير وبنكبر وماحناش زي ما إحنا اللي حبوهم!
الندم بيخطف.. الندم على قرارات في حياتنا لو ماتصالحناش معاها بيخطفنا.
الثورة بتخطف.. وبتتخطف.. واللي بيخطفوها بيحاولوا يخطفونا باسم الدين مرة و باسم العسكر مرة.
حياتنا بتتخطف مننا بالتدريج.
كده في لحظة… كل الوقت.. كل العمر.. كله بيخلص!
فجأة
حريق في بلكون الشقة يوم 20 يوليو 2015
الساعه 4 العصر تقريبا..
نجلا وسلوى لما اكتشفوا الحريق وحاولوا السيطرة عليه، فتحوا باب البلكونة ليمتد الحريق للشقة كلها للأسف..
وبعد ما تنقذ سلوى ونجلا
لكن ترجع سلوى للحريق
باين عشان تنقذ قططها
فتختنق سلوى من دخان الحريق مع القطط.
…
بس
مش بس الاختناق اللي خطف سلوى
ولا بس القطط
ولا بس الإكتئاب
ولا بس الندم
ولا بس الحزن
ولا بس الثورة
ولا بس الدين والعسكر
اللي خطف سلوى مننا كلنا
غالبا
الخوف!
الخوف على القطط اللي بقت أهلها
الخوف من بكرة بلا أمل
الخوف من الناس اللي بلا قلب
الخوف والتخويف من مجرمين الدين والعسكر
سلوى أختي سامعها بتقول: يا دودي.. ماتزعلوش.. أنا باحبك يا دودي :).. باحبكم كلكم
القطط و نجلا وسيوفه وطروقة وهشومة وسمسمة وكوووولكم..
وبطل موضوع الخطف ده يا ولد 🙂
انا مع مامي.. وها نبعت لكم من الجنة حضن وبوسة كل يوم، بدل الصور اللي كنت بابعتها لكم كل يوم و ادوشكم بيها 🙂
بس عندك حق يا دقدق..
مش قادرة اقول هتوحشوني..
عشان كنتم واحشيني أصلا..
خلوا بالكوا من بعض.. مالكوش غير بعض..
مامي قالتها.. واديني أنا كمان أهو باقولها..
باحبكوا..
🙂
إحنا بنبدأ نتخطف.. لما بنبدأ نخاف..
الخوف أذى.. و الحب حياة..
البقاء لله.. البقاء للحب..
البقاء لله.. البقاء للحب.