بما إنك بتستعمل موقع \”فيسبوك\” من خمس لـ ثمان ساعات يوميًا في المتوسط، وبقيت مُدمن مش بتقدر تشيل عينك من عليه دقيقتين على بعض، ومتابع كام لايك وكومنت وشير، لازم تبقى عارف شوية معلومات عن الموقع اللي بتستخدمه.
– انتشر في الأيام اللي فاتت إن فيسبوك هيبدأ في تغيير سياسية الخصوصية، وإنه هيخلى كل حاجاتك الخاصة والشخصية من صور وفيديوهات، وكل حاجة على حسابك، متاحة للناس التانية، وإنك عشان تتفادى ده لازم تحط اعتراضك على هيئة بوست فيه مجموعة قوانين بتعلن فيها رفضك لده، عشان فيسبوك يسمع كلامك.
طبعًا الكلام ده كله مالهوش أي لازمة، ولا أي أساس من الصحة، لإن أولًا دي مش طريقة تعامل فيسبوك مع الجمهور بتاعه، تاني حاجة، هو بالفعل مُطلع على كل بياناتك الخاصة وصورك، فمش محتاج أصلًا.
وانتشر البوست ده في كل أنحاء العالم، واترجم للغات كتير، وبقى النيوزفيد مليان بوستات من النوع ده، وصحابها مؤمنين بإن فيسبوك هيوافق على اللي كاتبينه ويسيب أشياءهم في حالها!
فيسبوك طلع تنبيه من ساعات كده، بيقول فيه إن في أنواع بوستات بتقول إن الموقع هيقوم بتغيير سياسيات الخصوصية الخاصة به، وإن الكلام ده مش مظبوط بأي شكل من الأشكال، وإن لو في أى تعديل في قوانين الخصوصية، فأكيد فيسبوك هيعلن بنفسه.
طبعًا دي مش أول اشاعة تطلع عن فيسبوك، قبل كده من أكتر من سنة، انتشرت إشاعة إن فيسبوك هيبقى باشتراك مادي، يعنى هتدفع فلوس بدل ما أنت قاعد ببلاش!
طبعًا الناس ساعتها اتصدمت، وقعدت تعمل شير في بوستات بترفض ده، وفي الآخر فيسبوك نفسه زهق، وأعلن إنه موقع مجاني وهيفضل مجاني، وأضاف الشعار ده على صفحته الرئيسية عشان الناس تصدق.
وبمناسبة خصوصياتك، متقلقش عليها، كل حاجة هما شايفنها.. الفيسبوك عارف أنت بتفكر في إيه، وبتدور على إيه، ونفسك تشترى إيه، وبتحب مين، وبتدور في السيرش على مين، وحتى لو كتبت كلام ومسحته قبل ما تنشره، بيقدروا يقروا الكلام ده.. فيسبوك بوك لو قريت قوانينه اللي أنت بتوافق عليها من غير ما تبص عليها، هتعرف إن من حقهم يطلعوا على أي حاجة خاصة بيك مهما كانت درجة خصوصيتها، سواء صور أو فيديو أو رسائل خاصة بينك وبين حد تاني.
فيسبوك بيعمل كده في المُعظم لأغراض تجارية وأغراض بحثية، عاوز يعرف الناس بتفكر في إيه، عشان تلاقى في النيوزفيد كل حاجة أنت عاوزها أو بتفكر فيها، فتكون حياتك أسهل، وتبقى مرتاح نفسيًا مع الموقع، فتقضي عليه وقت أكتر، وتبقى نشيط عليه.. فيسبوك مش عاوزك تسيبه من الآخر.
بس اطمن، فيسبوك أعلن إنه مش هيدى بياناتك لحد، مهما كان، وإنه بيرفض عروض الحكومات في إن حد يطلع على بيانات بروفايل عنده، وكان مارك مؤسس فيسبوك قد أعلن تضامنه مع شركة Apple اللي رفضت طلب من الحكومة الأمريكية بإنها تفتح حساب \”إرهابي\” على Icloud وعلى iphone، اللي لقوه في مكان الحادث.. شوفت؟ أهو إرهابي ورفضوا أن تطلع الخكومة على بياناته، من أجل الحفاظ على فكرة احترام الخصوصية.
بس ده مش معناه إنك تسيب كل حاجة أونلاين.. أقدم وأهم نصيحة لأي مستخدم للإنترنت، لو عندك حاجة مُهمة مش عاوز حد يشاركك فيها، متوصلهاش بالإنترنت، غير كده، ففي الأغلب في ناس بتتشارك في خصوصياتك.