يا حبيبتى سامحى خوفى
سامحى ضعفى واكتئابي..
وانسحابى ف ليل حزين
مش بإيدى غصب عنى
ف الشوارع.. والقهاوى..
والحوارى.. مخبرين
النهاردة ياحبيبتى
وقفونى، فتشونى، بهدولنى.. ف الكمين
دوروا عنك ف ورقى…
جوا صورى..
وف هدومى
قالى واحد منهم أنطق.. مصر فين؟
قُلت جوا القلب شوفها ياضرير…
يا عديم الأنسانية
إحنا مش من أم واحده
أمى مصر … وانت أمك مصر تانيه
جرجرونى لحد ظابط بيه برتبة
بص فيا.. وف العساكر…قال ده مين؟
رد واحد م التنابله
اللى هانوا المعنى فيا
قال: ده واحد كان معدى من دقايق ف الكمين
أدى حتى يابيه بطاقته
قال عظيم الشان جلالته باقتدار
بعد ماقلب بطاقتى حته حته
ــ أسمك إيه؟!!!
قلت عندك ف البطاقة
اسمى زى الشمس واضح ف النهار
ـــ رد يابن الكلب جاوب باختصار.. كلمة تانيه.. هقوم.. واهينك
قلت جهل الروح إهانه…
وانت جهلك هو دينك
اسمى سالم
اسمى واحد م الغلابة
الفقارى المطحونين
اللى تاهوا ف الشوارع
والحوارى من سنين
واللى داقوا المر حنضل
طول وعرض
ليل نهار
واللى شافوا ياسيادتك
إن بيع الأرض عار
وإن أرضك يعنى عرضك.. يعنى دمك
يعنى مثلا هل يجوز يا سيادتك
اللى شارى تبيع له أمك
بس أخرس يا عميل يا ابن الكلاب
ركعو ع الأرض حالاً
سففوا منها التراب
ركعونى ياحبيبتى..
هانوا روحى
غبت تايه جوا دمى
وف جروحى
\”انتفضت…
بكيت…
ناديتك.
يا حبيبتى داوى خوفك
واخرجى م الضعف
أقوى من ظروفك
مهما دارى العسكرى
يا مصر شوفك
أو بأمر البيه
ضربنا بالرصاص
جاى بعد الحزن عيد
جاى بعد الليل خلاص.\”