أيوه هو ده نظام الستات في بلادنا، وسبب وكسة المجتمع الشرقي بحاله.. بقت الست تعود ابنها اللي المفروض تكون بتربيه، وتربي جوزها اللي أمه مربتهوش!
بداية من أول ما يتولد ونظرة الانتصار في عنيها إنها كادت سلفتها، وفلفلت جارتها، وجابت الولد \”المعجزة الكونية\” ومن يوم الولاده بتبدأ في رحلة إتلاف الحزين ابنها بطريقة غير مقصودة، بجُملة \”نت راجل\”.
أخته تنضف له وتغسله وتكوي له وتحضر الأكل لأخوها الراجل، ومن حقه كسر جميع القوانين لأنه راجل، وكأن كلمة راجل دي بتعني \”المعاق حركيا وذهنيا، والفاقد للأهليه في المنزل\”!
رخصه وكارت أبيض لفعل ما يشاء، وقتما يشاء، لغايه ما يكبر، ويبقي زوج محتاج يتربي من أول وجديد، وتبدأ رحلة الزوجة التعيسة اللي بتتحطم كل أحلامها بعد أول ساعتين جواز، ومع الوقت بيصبح شعارها: \”ضل راجل ولا ضل حيطة\”.. وفي بعض الحالات الحيطه بتضلل أحسن منه.
الخلاصة: محدش بيختار نوعه، لكن كل واحد فينا ممكن يكون \”الراجل\”.. الراجل مش نوع في بطاقة.. الراجل أخلاق وجدعنة وتربية.. الراجل أسلوب حياة.
الأم اللي ربت زمان بالتسعة والعشرة، دي أم راجل.. الست اللي شالت بيتها لوحدها أو وقفت جنب جوزها في محنته، دي ست راجل.
إمتى هنربي الولد إن كلمة راجل دي، يعني مسئول.. يعني قيد أكتر.. ما هي حرية يعني أنت القوي اللي تتحمل، وأمك أو أختك أو مراتك هي الضعيفه وأنت راجلها وحاميها وضهرها.. إمتى الأمهات هتبدأ تربي صبيانها؟! إمتى الراجل هيبقى الراجل؟