عارفين المشكله الأساسية في الوضع الاقتصادي اللي إحنا فيه وواقعه على الناس إيه؟ إننا مش عارفين آخرتها إيه؟
هل في حد من الحكومة طلع وقال: \”الحكومة لازم تعمل كذا، عشان نظبط الوضع الاقتصادي\”، طب حد قالكم: \”إن لو البرنامج اللي تم وضعه لو مشينا عليه صح، المشكلة حتتحل بعد (مثلا) خمس سنين\”.. في حد ألزم نفسه بأي حاجة؟ خالص.. كل اللي بنسمعه هو إن \”الحكومه تعمل بأقصى طاقتها\”، ومصدرين لنا محافظ البنك المركزي عشان نشتم فيه، مع إن اللي يفهم، يعرف إن حل مشكلة الدولار مش في إيد محافظ البنك المركزي، إنما في إيد وزراء ما يسمى بالمجموعة الاقتصادية.
محافظ البنك المركزي عبارة عن Treasurer أو أمين صندوق.. اللي حيتحط في الصندوق هو حيديره بأحسن شكل.. طب سيادة أمين الصندوق ده حيدير إيه لو الصندوق فاضي؟! حيدير بلح طبعا! طب فين اللي المفروض يجيب الدولار؟ فين وزير المالية ووزير الاستثمار ووزير التخطيط ووزير السياحة إلخ إلى آخر الوزراء اللي المفروض يدخلوا أموال للبلد؟!
حد فيكم بيسمع حاجة عنهم؟ طب حد بيشتمهم؟ ولا الهوا.
آداء المجموعه الاقتصاديه لا يختلف بإي شكل عن آداء مدام عفاف والأستاذ عبد المولى، اللي ماسكين أرشيف مكتب صحة في قرية نائية في الوادي الجديد!
هي اللوائح بتقول إيه؟ نفذ يا أستاذ عبد المولى.، حاضر يا مدام عفاف. وشكرا على قد كده.
وألذ حاجة.. إنت اللي غلطان.. أيوة إنت يا مواطن، ومش بس غلطان.. ده إنت اللي غلطان وحتشيل الليلة كمان! أي حاجة يطلعوا يقولوا: \”أصل الشعب اللي عمال يستورد\”، أو \”عشان إنتوا شعب زبالة حنشيلكم الليلة كلها يا شعب نمرود، مش مقدر نعمة إننا نحكمكم\”!
مع إن الشعب ده لو كان لقى سلعة محلية أرخص وبجودة ولو قريبة حنى لو من بعيد، كان اشتراها، لكن هو مش لاقي غير زبالة المستورد قدامه، عشان دي بلد مش بتنتج أي نيلة.. ده حتى التكييف بتاع المصانع الحربية طلع مستورد!
أقولكم حاجة: ملعون أبونا شعب زبالة.. حلو كده؟ ياللا هجرونا بقى واقعدوا كوزراء في البلد لوحدكم بعيد عن الشعب المقرف اللي إنتوا المفروض بتشتغلوا عنده ده!
وبصراحة مش ذنبهم، ومن حقهم تالت ومتلت إن هما يفكروا ويتصرفوا كده.. حد فيهم وعدكم بحاجة؟ لا.. يبقى مالكش حق إنك تحاسبهم.
إذا إنت انتخبت اللي جابهم من غير ما يعرض عليك لا برنامج ولا وعود ولا حتى ورقة نوتة مكتوب عليها خواطر.. يبقى تحاسبه إزاي؟!
إنت آخرك تفرح غصبن عنك بالإنجازات اللي بتقطع من لحمنا الحي ومن فلوس مش معانا وبندفع الطاق أربعة عشان المشاريع تخلص بسرعة، عشان تمجد في شخص بعينه، ومش بس كده.. دهإنت ناوي تتنتخبه تاني، واللي مش ناوي ينتخبه، حتعتبره خائن رعديد!
هل فيه في الدنيا شغلانة أحسن من كده؟!
بصراحة أنا مش متفائل إطلاقا، وسبب عدم تفائلي مش وضعنا الحالي.. أي حاجة وليها حل ولو على أمد طويل.. سبب عدم تفائلي هو إني مش شايف حد بيحاول يعمل أي حاجة عشان يحل أي حاجة.