خلوني أكلمكم عن حاجة تافهة.. يعني مثلا أكل الكلاب.
أنا عندي كلب.. هو آه بقى عجوز وأعمى ونكدي وأطرش ورخم، وأنا شاكك إنه مش بيشم كويس.. بس لسه بحبه بحكم عشرة ١٦ سنة ليل نهار في وش بعض.
كلبي ده بياكل أي حاجة.. بمعني أي حاجة.. مسقعة دايس.. مانجة شغال.. بياكل أي حاجة تقع تحت إيده ومش بيفرق معاه.
ومع إن معظم الوقت هو بياكل كل البواقي بتاعتنا، لكن أنا برضه في أي وقت بيكون عندي كيس أكل دراي فود، عشان لو مفيش حاجة ياكلها، وطبعا بيبقى من النوع المستورد، مع إن كان في موجود منه مصري!
طب ليه مش بأكله المصري؟! عشان ببساطه رافض ياكله.. رافض يعني رافض.. لدرجة إني مرة عندت معاه وسبته جعان يوم بحاله، عشان أغصبه إنه ياكله، وهو فضل رافض الأكل ده! مع إن لما بحثت لقيت إن أكل الكلاب الدراي فود ده عبارة عن هرس حاجات كتيره من اللي بيفضل من عظم وبواقي البقر والفراخ، وبعملية بسيطه جدا بيطلع في الآخر البتاع اللي بياكلوه ده.. يعني مش محتاجة معمل كيمياء فوتونية!
الموضوع بسيط جدا، مع ذلك الكلب اللي بيدوس في أي حاجة مش راضي يحط الأكل المصري ده في بقه، حتى قصاد شبح التجويع! مع العلم إن سعر المصري كان مقارب جدا للمستورد!
طب بلاش أكل الكلاب.. تعالوا على البطاطس المقلية الجاهزة المصرية بتاعتنا.. تنزل تشتري النوع الpremium بتاعه.. تييجي تقليه يطلعلك شيء عبارة عن صوابع مشبعة بالزيت.. تنزل تشتري المستورد اللي جاي من آخر الدنيا وأغلى باثنين ثلاثة جنيه فقط عن الpremium المصري، تلاقي حاجة تحفة ومقرمشة وجميلة، مع إنه هو هو نفس ذات الزيت والقلاية اللي استعملتها في ده وده!
طب.. أنا ليه اشتري المصري؟ ما المستورد اللي جايلي، مسافر من آخر الدنيا مش أغلى من المصري تماما (وبعض الأحيان أرخص) وأحسن منه بمراحل ضوئية، والأهم من كده، إذا إحنا مش عارفين نعمل شوية بطاطس ونهرس شوية عظم وبواقي فراخ وبقر عشان الكلاب ترضى تاكله.. أومال حنيل إيه في الحاجات الثانية؟!
يا سادة.. في باقي كوكب الأرض الدول بتسعد، بل في دول بتسعى انها تنزل من سعر عملتها عشان تعرف تصدر وتكثر من تصديراتها وتكسب أكثر وأكثر وأكثر.. إلا إحنا.. ليه؟!
عشان إحنا مش عارفين نصنع أي حاجة تماما!
يا سادة.. حل أزمة الدولار سهل.. ننتج أي حاجة.. أي حاجة بمعنى أي حاجة.. بس ننتجها صح وزي ما الناس في باقي الكوكب بتنتجها.. بجد سهلة مش صعبة.
هما بره بيعملوها إزاي؟ اعمل زيهم.. سهلة مش صعبة.. لو بطلنا شغل الcost saving الفهلوي واستعملنا خامات وطرق تصنيع صح مع quality checks طبيعية، وفي نفس الوقت ما استعبطناش في التسعير.. أؤكد لكم إن المصانع مش حتعرف تكفي السوق المحلي من كتر التصدير.. يعني مثلا بدل ما الحكومة عمّالة تجري يمين وشمال عشان توفر دولار للمستوردين عشان يستوردوا، يتعبوا نفس التعب، وبدل ما يستوردوا (مثلا) توك الشعر وبنس الشعر/طرحة وأساتك وأقلام، يستوردوا المكن اللي بيصنع التوك وبنس الشعر/طرح والأساتك والأقلام.. صناعات بسيطة وسهلة، ومش محتاجه أي نوع من الخبرة أو علم أو افتكاس، ويجيبوا كام مستثمر ويخلصوا له ورقه في قعدة واحده (بدل ما يتلطم ما بين مليون مكتب وختم نسر اللي طفشت كل من فكر يحط فلوسه في البلد دي).
وزيادة على كده، إديلهم إعفاء ضريبي يبدأ من ساعة تشغيل المكن (مش إنشاء الشركة عشان ما تتقفلش قبل نهاية مدة الإعفاء وتتفتح تاني بنفس الناس عشان يعملوا reset لمدة الإعفاء الضريبي)، واقفله استيراد الحاجات دي أول ما يطلع منتج يكفي السوق.
كده إنت بثمن كام شحنة من هذه السلع الصغيرة التافهة، حتكون عملت صناعة تعفيك من إنك تدفع دولارك اللي إنت مش لاقيه في الحاجات التافهة دي، وبالدولار اللي إنت وفرته ده، تجيب مكن تاني بتاع حاجات تافهة تانية، وتعمل نفس الحكاية، لحد ما توصل لأنك مش محتاج تستورد غير اللي مستحيل أو صعب إنك تصنعه هنا.. بس بجد بجد مش كيمياء عضوية، ولا أنا أعبقر عبقري في علم الفيزياء اللوذعية.. الموضوع سهل واتعمل قبل كده!
ويا سلام بقى لو صدرت الفائض بتاعك، لكن دي مرحلة متقدمة شوية.. المهم دلوقتي كفي سوقك الأول، وبعد كده كل حاجة حتييجي بالتبعية.. ابتدي بس إنك تحمي دولارك الأول، وبعدين فكر إنك تجيب دولار.. مفيش حاجة حتتحل في يوم وليلة، بس برضه مفيش حاجة حتتحل لو إنت مش بتعمل حاجة عشان تحل المشكلة اللي إنت واقع فيها.
الكلام ده مش إرهاصة ولا تفكير تنويري ولا أي حاجة من الكلام ده.. الصين وكل جنوب شرق آسيا نهضوا كده، بعد ما كانت حالتهم زي الزفت.. لم يفتكسوا ولم يخترعوا العجلة.. شافوا الحاجة بتتعمل إزاي وقلدوهم بالحرف والسنتي.. بس بجد مفيش أسهل من كده.
مش لازم يكون اللي أنا بقترحه ده صح، وأكيد في مقترحات أحسن من اللي اقترحتها دي.. أنا طبعا لست عالما بكل شيء، لكن إننا نكون مش عارفين نعمل حاجات تافهة زي أكل كلاب وبطاطس مقلية وتوك وبنس شعر/طرحة وأساتك وأقلام.. يبقى لا نلومن غير أنفسنا على الأزمة اللي إحنا فيها دلوقتي.. لا مؤامرة دولية كونية ولا بختنا المايل ولا أي حاجة من الكلام ده.. إحنا بس.
وتأكدوا.. محدش حيغني تسلم الأيادي وهو جعان.