– الدين بيقول إيه؟
(أياما معدودات فمن كان منكم مريضا أو على سفر فعدة من أيام أخر وعلى الذين يطيقونه فدية طعام مسكين فمن تطوع خيرا فهو خير له وأن تصوموا خير لكم إن كنتم تعلمون (184) شهر رمضان الذي أنزل فيه القرآن هدى للناس وبينات من الهدى والفرقان فمن شهد منكم الشهر فليصمه ومن كان مريضا أو على سفر فعدة من أيام أخر يريد الله بكم اليسر ولا يريد بكم العسر ولتكملوا العدة ولتكبروا الله على ما هداكم ولعلكم تشكرون) (185).. صدق الله العظيم.
واخد لي بالك من التكرار في نفس السورة، وفي آيتين ورا بعض 184 و185، إن المريض والمسافر، يفطروا عادي، ويعوضوا صيامهم بعدين.. وحصل خير؟ لو ماخدتش.. خد.. وحُط لي يا ابني خطين هنا تحت \”يريد الله بكم اليسر\”.. عشان إحنا بقينا في زمن \”أنا أريد والله يريد، وفضيلة الشيخ يريد حاجة تانية خالص\”.
– الشيخ بقى يريد إيه؟
قالت دار الإفتاء المصرية إن المجاهرة بالإفطار في نهار رمضان، هي نوع من \”الفوضى والاعتداء على قدسية الإسلام\”، والدكتور عبد الغفار هلال -المفكر الإسلامي- \”شدد\” على \”وجوب\” شن حملات للقبض على المفطرين في نهار رمضان، معتبرًا ذلك نوعا من \”الفجور\”، مضيفًا: \”الفاجر لابد من معاقبته، لأنه تعدى على قدسية الإسلام، ولم يستر \”مصيبته\”!
– فالشرطة عملت إيه؟
قامت العديد من الحملات الأمنية باستهداف المجاهرين بالإفطار فى نهار رمضان بمحافظات الجمهورية، تنفيذًا لفتوى دار الإفتاء المصرية، وتكسير العديد من المقاهي وإتلاف محتوياتها والقبض على العاملين فيها!
يا حلاااوة.. (بصوت مظهر أبو النجا).
– فإنت كمصري المطلوب منك إيه؟
مطلوب منك تنسى إن ربنا عايز يسهلها عليك، وركز مع كلام الشيخ اللي لسانه بينقط \”يسر\”، والشرطة اللي بتأمر بالمعروف وتنهى عن المنكر، وهي بتكسر وبتضرب وبتسب وبتلعن.. معروف معروف يعني، مابيهرجوش، وحاول إنت كمواطن صالح تقوم بدورك.. يعني مثلا لو على سفر، يبقى تمشي بباسبورك في جيبك.. تذكرتك في إيدك، وصورة حديثة 4 في 6 خلفية بيضا ودانك باينة فيها.. تبقى معاك لزوم التأكيد.
لو بقى مريض، يبقى تدّي حظابط ما يثبت.. قِب بحقنة أنسولين.. شلّح يشوف الكانيولا.. ممكن تمشي بمحلولك في زمزمية صغيرة على أد المشوار.. أضعف الإيمان يا أخي، تحتفظ في محفظتك بكشف دكتور مايكونش عدى عليه أكتر من 48 ساعة، أو تكح تجيب دم من بقك.. المهم تتصرف.
أما بالنسبة للسيدات، فالموضوع هيبقى محرج شوية.. يعني لو بلغ بيكي الفجور إن فترة الحيض جات في رمضان، أو ربنا مبتليكي وحامل -لا سمح الله- أو -نيجي للكارثة- إنك تكوني بترضعي مثلا! فماتنزليش من البيت قبل الفطار أكرم لك! أصل إثبات إللي إنتي فيه ده هيتسبب في فضيحة، وإحنا مش حِمْل إعلان لايف للدوندو! والفضيحة ليكي طبعا مش لحضظابط والعياذ بالله.. ده الراجل قايم نايم واقف صايم في الحر ده يقوم بواجبه ويقبض على الفاطر، ويسب له الدين في نفس الوقت على التوازي!
المسيحيون بقى، أمرهم سهل.. في الموقف اللي زي ده، هتتعامل كمسيحي مش كمصري، وديانتك في البطاقة هتحوش عنك \”معروف\” لا قبل لك به.
أخيرا.. أنا بقول إننا مابقيناش مضطرين نطبق الفكر الوهابي عندنا خلاص.. اللي كانوا كاسرين عيننا بالرز، إحنا دلوقتي ندب صوابعنا العشرة في عينيهم.. ده إحنا سايبين لهم -بلوشي- جزيرتين نقاوة استعمال طيار، ويصلحوا لأغراض سكنية أو تجارية.. جزيرتين دخلنا بسببهم حروب.. جزيرتين شاربين دم شهدا عالي الجودة.. جزيرتين رافعين على اللي باعهم قضية، وهنكسبها، فلغاية ما نكسبها، وبعد ما نكسبها.. نحب نقول لكم: \”إحنا من عابدين يا سعوديين\”.